Nunap ikuallannera Pisuttut pingasut Issittumi Sakkutooqarfimmit annaanneqartariaqartut

Politiit pisuttunit pingasunit Kangerlussuup Sisimiullu akornanni nunap ikuallannerata pujuanit eqqugaallutik sumiiffeeruttunit ippassaq unnukkut ajornartoornermik nalunaarutisipput.

Politiit siullermik Air Greenlandip qulimiguuliutaanut S-61-imut ikioqqullutik saaffiginnipput, Sisimiuniit Kangerlussualiarluni ingerlammat. Qulimiguullilli ajornartoortut nassaarinngilai.

AAMMA ATUARUK Nuna ikuallattoq ima qamisarneqassaaq

Kingornatigut umiarsuarmii Absalonimiittoq Issittumi Sakkutooqarfiup qulimiguuliutaa nutaaq Seahawk tingivoq.

Sivitsunngitsorlu takornariat marluk takornarianillu nassuiaassisuat nassaarineqarput. Qulimiguulimmi malussarniutit malussarissut atorlugit ajornartoortut nassarineqarput, sunaaffa qaqqami ikuallanneq ikummaqqissimasoq ilisimanagu Kangerlussuarmiit pisullutik aallarsimasut.

Politiit saaffiginninnerisigut pisuttut taakku pingasut nakorsamit misissugassanngorlugit Sisimiunut timmisartuunneqarput.

Sakkutuut timmisartuannit Challengerimit Sisimiut eqqaanni ikuallattoq ulloq aggustip arfineq-pingajuanni immiunneqartoq.

Issittumi Sakkutooqarfimmi sakkutuut naalagaat nakkutilliisoq naapertorlugu ajornartoortut peqqipput timikkullu ajoqusersimanatik.

Kangerlussuup Sisimiullu akornanni ikuallanneq juulip arfineq-pingajuanni aallartippoq nunatsinnilu poliiit naapertorlugit pujoorivimmit aallarnerneqarsimalluni.

Qatserisartut namminerlu piumassutsiminnik sulisut arlaleriarlutik inneq qamittaraluarpaat, issumili aamaaginnarpoq anorillu sakkortuup akuttunngitsunik ikummarteqqittarpaa.  

Upalungaarsimanermut Aqutsisoqarfiup qatserisartut danskit 38-t atortuilu immikkut ittut Sakkutooqarfiup timmisartuanut Herculesimut ilaatillugit avannamut aallartippai ikuallannersuarmik qamisaanermut siaruaakkiartunnginnissaanullu ikiuukkiartortillugit.