Pissutsit kanngunarsiinnartut Obamamut iluaqutaasinnaapput
Amerikami præsidentiusartuni Obama siullersaalluni qaasuitsup killeqarfiata avannaanut angalavoq. Obama angerlamut apuunnermini naalakkersuinikkut anguniagassarpassuaqarpoq.
Unammilligassammi annertoqaat, ilaatigut silap pissusiata allanngoriartorneranut tunngasuullutik, aammattaarli USA-p issittumi sikunik aserorterutaatai ikeqisut nutarteriffigineqartariaqarmata.
Issittup imartaani angallattoqarnerulernera pissutigalugu ujaasinernut annaassiniarnernullu atugassamik sikunik aserorterussuarmik sanatitsiniarluni, Obamap angalareerluni oqaatigaa. Qularnanngitsumilli Ruslandip issittumi inissisimaneranut atatillugu kinguaattoorpallaannginnissaq aamma pissutigalugu.
Siunnersuutilli taassuma Kongressimi, Republikanerinit aqunneqartumi, akuersissutigitinniarnissaa Obamamut Demokratinullu ajornakusuussaqaaq. Tassami aningaasartuutissatut missingersuutit Kongressimit akuersissutigineqartussaammata, sikunik aserorterummik 6 imaluunniit 7 milliardit koruuninik akilimmik sanatitsinissap akuersissutigitinnissaa ajornakusuussaqimmat.
Læs også Barack Obama issittumi illoqarfimmi alutorsaatigineqartoq
Præsidentip angalanera silap pissusiata allanngoriartorneranut tunngassutilerujussuuvoq, aamma naak Obamap allannguutit tamakkua nammineq isiminik takugaluarlugit suli unammilligassarpassuaqarpoq. Tassami Kongressimi ilaasortat ilarpassuisa aamma Amerikamiut 60 procentiisa silap pissusiata allanngoriartornera upperinngilaat.
Neriuutissaqartorli Alaskami ilisimatuut ilaat KNR-imut naliliivoq.
- Rusland 41-nik sikunik aserorterutaateqartoq, USA taamaallaat sinerissamik nakkutilliissutinik sikusiornermi atugassatut qajannaallisarsimasunik marlunnik pigisaqarmat, allaat kanngunarsiinnalerpoq. Tassa ajutoortoqassagaluarpat Russit ikiuiartortariaqassapput. Nunarsuarmiut silap pissusiata allanngoriartorneranut iliuuseqarniarnerannut USA-p siuttuunnginnera aamma taama kanngunartigaaq, ilisimatooq kinaassutsiminik isertuusserusuttoq oqarpoq.
Pissutsit taamaannerat Kongressimit immaqa iliuuseqarfigineqarsinnaassasoq, præsident Obamallu pilersaarutaa malinneqarsinnaassasoq taanna naliliivoq.
