Pissartanngorniuteqataasut Qeqertarsuarmi meeqqanik nuannisartitsipput
Qungujulaneq, illarpalaaq nuannaatsannerlu Qeqertarsuup arsaaffiani pingasunngornermi tusarsaapput angutit arsaannermi pissartanngorniunneranni unamminngiffimmi.
Nuannaarneq pissartanngorniuttunut samminani tassaavoq meeqqat nuannisarpalunnerat pissartanngorniuteqataasut IT-79 Nuummeersut peqatigalugit.
- Qeqertarsuarmi Kommune Qeqertalik attaviginikuuara oqaluttuullugit ullormi arsanngiffimmi meeqqanik sammisaqartitsinissamik soqutiginnittugut. Qujanartumik saaffiginnissupput ilassilluarneqarpoq, IT-79-mi sungiusaasuullunilu arsaateqataasoq Peri Fleischer KNR-mut oqarpoq.
Akillugit tunisipput
Nunatsinni pissartanngorniunnerit naammassiartulerput unammisoqarneranilu meerarpassuit isiginnaaqataasarput. Piffissanngorporlu aamma taakku arsaaffimmi arpasaqattarnissaannut.
- Nunatsinni pissartanngorniunnermi meeqqat nuannaartorisaqalersarput. Taamaattumik isumaliutiginikuuara meeraalluni nuannissaqisoq unammiartunit peqatiserineqarnisaq. Tamanna aamma iluatsisinnaappat uagutsinnut pitsaassarami, Peri Fleischer oqarpoq, itisiliillunilu:
- Uagut iligiittut pissarsiarput tassaapput ataatsimoornitta nukittorsarnera. Meeqqat nuannisarnerat takuinnarlugu nuannersorujussuuvoq aammalu takusinnaallugu immaqa nuannaartorisatik peqatigalugit pissarsiaqartut, Peri Fleischer oqarpoq.
Kissassertoqarpoq, arsalerisoqarluni, isertitseriaqattaartoqarluni unammisoqarlunilu.
Qeqertarsuarmiut ilisimaneqaatigivaat tikilluaqqusaasutut tikeraat misigittittarnerat. Pissartanngorniunnerlu pisoq annertuujusoq taamatut aamma pisoqarfiuvoq.
- Assut nuannersumik misigitinneqartuaannarpugut tikilluaqqusaasutullu misigisimalluta. Imaallaammiaat aamma utertitsiffigalugit illoqarfiup meerartai tunissuteqarfigaagut, Peri Fleischer oqarpoq.
Angutit arsaannermi pissartanngorniunnerat arfininngornermi naammassissaaq. Unamminerit toqqaannartumik KNR2-mi isiginnaarneqarsinnaapput aammalu unamminerit KNR-ip nittartagaa iserfigalugu isiginnaaqqinneqarsinnaallutik.
