Pissakinnerusut meeraasa angalasinnaanissaannut aningaasaateqarfimmut tapersersuisoqarpoq
![](/sites/default/files/styles/image_934x467/public/article_images/21862773584_3669547559_k.jpg?itok=kBxLAH6S)
Aningaasaateqarfik 4 millionit koruunit tikillugit aningaasaateqarsinnaasoq Inuit Ataqatigiit takorloorpaat, siunnersuullu Inuit Ataqatigiinnit, Partii Naleqqamit, Atassummiit, attaviitsumiillu Per Rosing Petersenimit tapersersorneqarluni ataatsimiititaliamut suliareqqitassanngortinneqarpoq.
Meeqqalli ilaqutariinnit isertitakinnerusuneersut angalasinnaasarnissaat pillugu aningaasaateqarfimmik pilersitsisoqarnissaanut siunnersuut Naalakkersuisunit tapersersorneqanngilaq, pisortat ikiorsiissutigisartagaasa meeqqanullu tapit aaqqiussuuteqqinneqarnissaanni ilaqutariit isertitakitsut minnerunngitsumillu meerartallit aningaasaqarniarnerisa pitsanngorsaaffigineqarsinnaanerinut periarfissat ilaatigut misissorneqassasut oqaatigalugu.
Demokraatit siunnersuummut aamma isumaqataanngillat, aningaasat allatut atorneqarsinnaanissaat tikkuarlugu, aningaasaateqarfinnillu pilersitsisarnerit namminersortunit annerusumik isumagineqartarnerat aamma oqaatigalugu.
Siunnersuummut tapersersuisut tapersersuinerminnut atatillugu oqaatigaat aningaasaateqarfimmik taamaattumik pilersitsisoqarpat ilaqutariit pissakinnerusut pitsanngorsaavigineqassasut, meeqqallu peroriartornerannut iluaqutaassasoq. Siunnersuut taamaalilluni ataatsimiititaliami suliareqqitassanngortinneqarpoq.