Pisortatigoortoq: Kim Kielsen Inatsisartunit sulinngiffeqarpoq
Inatsisartunut ukioq manna apriilimi qinersisoqarmat Siumukkormiuni qinerneqarnerpaaq, Kim Kielsen, Inatsisartunit sulinngiffeqarpoq.
Taarsiullugu Nikkulaat Jerimiassen Kim Kielsenimut sinniisussatut ivertinneqarpoq.
Saqqumilaanngilaq
Kim Kielsen Inatsisartunut ukioq manna apriilimili qinersisoqarmat saqqumilaanngilaq. Inatsisartunut qinersisoqarmalli Naalakkersuisunut apeqquteqaranilu Inatsisartut ukiaanerani ataatsimiinnissaanut siunnersuuteqanngilaq.
Siumup siulittaasorisimasaa kingullermik ukioq manna juunip 25-ani tuttaqarpoq, taamani allaaserisani qulequtserneqarsimasoq 'Qaqortumi mittarfik SANANEQASSAAQ' Siumup nittartagaatigut saqqummersippaa.
Kim Kielsenip Siumumi pissaaneq siorna novembarimi annaavaa, taamani siulittaasussarsiorluni qinersinerup inernerinik 39 - 32-nik taasisoqarnerani Erik Jensenimit uppisinneqarami.
Qaammatialuilli qaangiunnerani Inatsisartunut qinersisoqarmat Kim Kielsen qinerneqarluarpoq.
Kielsenimmi Erik Jensen taaguunneqarnermigut qinersisunik 655-inik qaangerpaa, taamaalilluni inuttut 1.841-inik qinerneqarluni partiimini taaguunneqarnerpaajuvoq, Erik Jensen inuttut 1.186-inik qinerneqartoq.
Eqaluk aamma sulinngiffeqarpoq
Kisianni aamma Inuit Ataqatigiinnersoq Eqaluk Høegh, meeqqanut, inuusuttunut, ilaqutariinnullu naalakkersuisutut uippakajaarnini pissutigalugu aggustip 27-ani tunuartoq, aamma Inatsisartunit ukiup naanissaata tungaanut sulinngiffeqarpoq.
Inuit Ataqatigiinneersoq Mariia Simonsen Eqaluk Høeghimut sinniisussatut Inatsisartuni ingerlaqqippoq.
Eqaluk Høegh uippakajaarnermik eqqugaalluni sulinngiffeqarnikuuvoq. Tamanna juunimi pivoq ilaqutariinnut aamma inatsisit atuutsitsinneqarnerannut naalakkersuisutut ivertinneqarneranit qaammatialuinnaat qaangiuttut.
Tamatuma kingorna inatsisit atuutsitsinneqarnerannut naalakkersuisoqarfimmut tunngasut Naaja Nathanielsenip, ineqarnermut, attaveqaasersuutinut, aatsitassanut, naligiisitaanermullu naalakkersuisooreersup, akisussaaffigilerpai.
Eqaluk Høegh uippakajaarnermik eqqugaalluni sulinngiffeqareernermi kingorna ilaqutariinnermut naalakkersuisutut atuuffeqaleraluarpoq - aggustilli naaneranit tassannga tunuarpoq.