Pisortat sanaartugaat pinnersaasersorneqartalissapput
Jane Petersen Inuit Ataqatigiinneersoq siunneersumik upernaaq inatsisartut katersorneranni saqqummiussisuuvoq. Maanna siunnersuut inatsisartut attaveqarnermut ineqarnermullu ataatsimiititaliaani suliarineqareerpoq tassanilu Inuit Ataqatigiit Demokraatillu tapersiipput.
Taannali sioqqullugu naaperiartoqarsimavoq. Jane Petersenip siunnersuut saqqummiuteqqaarmaramiuk siunnersuutigaa pisortat sanaartugaanni sanaartukkap akiata 1 procentia illorsuup iluata silataatalu kusassarneranut atorneqartassasoq. Siunnersuut aallaqqaamut Demokraatit eqqarsarnaqartoqartikkaluarpaat sanaartukkanut akitsorsaataaginnarnissaa aarleqqutigalugu. Taakku upernaaq isumaqarput aningaasat pineqartut kollegialiornermut sinerissamilu inissialiornermut atorneqarsinnaagaluartut.
Maanna naaperiartoqarsimavoq taamaasilluni aaqqissuussineq atorneqartassalluni sanaartukkat 25 millioner koruuninik akeqaraangata. Tassa imaappoq sanaartugaq 25 millioner koruuninik akeqaraangat 250.000 koruunit eqqumiitsuliornikkut pinnersaanermut atorneqartassasut. Taamatut allannguutissamik siunnersuut Inuit Ataqatigiit Demokraatillu saqqummiutissagaat, attaveqarnermut ineqarnermullu ataatsimiititaliaq isumaliutissiissummini allappoq.
Siumukkut siunnersuummut akerliupput isumaqaramik inuiaqatigiinni allat aningaasanik taakkuninnga pisariaqartitsinerusut. Ilaatigut tikkuarpaat inissiat iluarsaassinermut aammalu illunut oqummit eqqorneqarsimasunut aningaasat atorneqartariaqaraluartut. Siumukkut aarleqqutigaat iluarsaatassat oquttullu suliarinissaat kinguartiterneqarpat tamanna naggataani inuiaqatigiinnut akisuneruliinnarumaartoq.
Inatsisartut ukiaanerani katersorneranni siunnersuut aappassaanneerlugu suliarineqassaaq qaqugorpiarli oqaluuserineqassanersoq suli inissinneqanngilaq. Siunnersuut taannarpiaq Inuit Ataqatigiinneersup Asii Chemnitz Narupip 2007-mi inatsisartunut aamma saqqummiuppaa.
