Suliffeqarneq: Pisortat ikiorsiisarnerannik annertuumik misissueqqissaarisoqalersoq
Naalakkersuisut pisortat ikiorsiissuteqartarnerat pillugu tamakkiisumik aaqqissuusseqqinnissamik pilersaaruteqarput, tamannali pitinnagu suliassaqarfik misissuiffigeqqaarneqassaaq.
- Pisortat ikiorsiisarnerannik annertuumik misissueqqissaarineq Naalakkersuisut 2017-ip ingerlanerani aallartikkusuppaat, Agathe Fontain Atassummeersumut Mala Høy Kúkomut akissuteqarluni taama allappoq.
Misissueqqissaarnerup siunertaraa amerlanerusut sulilernissaannut ikinnerusullu pisortanit ikiorserneqartarnissaannut qanoq iliortoqassanersoq, tamannalu naalakkersuisooqatigiinnissamik isumaqatigiissummi 2016-imi ukiakkut isumaqatigiissutigineqartumi anguniagaavoq.
- Ullumikkut pisortanit ikiorsiissutinit innuttaasut tigusartagaannik arlalinnik aaqqissuusseqqinnissaq pisariaqartinneqarpoq, Fontain akissutimini taama allappoq.
AAMMA ATUARUK Sulisitsisut: Suliffissaaleqisut ikinnerulersinneqarsinnaapput
Inuiaqatigiinnilu eqimattat marluk Naalakkersuisut immikkut ikiorserniagaat naalakkersuisup tikkuarpai: Inuusuttut 25-t inorlugit ukiullit pisortat ikiorsiissutaannik pissarsisartut, aammalu innuttaasut suliffissaaleqinertik pissutigalugu unittooqqasut.
- Ajornartorsiutit tamakku misissuiffigeqqissaarneqassapput ajornartorsiutinullu aaqqiissutissanik suliarinnittoqassalluni, Fontain, Sara Olsvigip erninerminut atatillugu suliffeqarneranut atatillugu isumaginninnermut naalakkersuisuugallartoq taama allappoq.
Innuttaasut ukiumi kingullermi qaammammi ataatsimi sivisunerusumiluunniit suliffissaaleqinermik eqqugaasimasut 7.962-iusimasut, Nunatsinni Naatsorsueqqissaartarfik taama allappoq.
AAMMA ATUARUK Nunaqarfinni suliffissaaleqisut amerleriartut
