Sulisitsisut: Suliffissaaleqisut ikinnerulersinneqarsinnaapput
Suliffissaaleqisut pillugit kisitsisitigut paasissutissat kingulliit Naatsorsueqqissaartarfiup ippassaq marlunngornermi saqqummiuppai. Kisitsisillu taakku Sulisitsisuni pisortap Brian Buus Pedersenip nuannaajallannartippai.
- Suliffissaaleqisut ikiliartulersimanerannik nutaarsiassaq nuannersuuvoq, pisortaq oqarpoq.
Sulisitsisulli champagnimik ammaanissaminnut suli pissutissaqarsorinngillat. Isumaqarpummi suliffissaaleqisut suli ikinnerulersinneqarsinnaasut.
- Suli amerlanerusut sulilernissaat kissaatigigaluarparput. Sanaartorfinnimi, aalisakkerivinni allanilu sulisussaaleqisoqartoq takusinnaavarput. Tamannalu imminut assortortutut ippoq, suliffissaleqisummi suli amerlavallaarujussuarmata, Brian Buus Pedersen taama oqarpoq.
Aamma atuaruk Suliffissaaleqisut ikiliartortut
Sulisitsisut naapertorlugit suliffissaaleqisut ikiliartulersimanerannut pissutaasoq tassaavoq aalisarnerup iluani sulilersut amerlisimanerat, aammali sanaartornerup iluani sulilertoqarsimanera pissutaaqataasoq.
- Aalisarnerup iluani aningaasaqarneq pitsaasoq pissutaaqataalluinnarpoq. Aalisarnerup iluani piffissami sivitsortumi ingerlalluartoqarpoq, aningaasallu tassanngaanneersut, inuiaqatigiinnilu kaaviiartinneqartut suliffissaqartitsinerulerput. Aamma illoqarfinni anginerni sanaartornermik suliniutit angisuut marlussuit ingerlanneqarput, soorlu Nuummi pineqaatissinneqarsimasunut inissiisarfittaassaq aamma umiarsualivittaassaq, taakkulu sunniutaat maanna takusinnaalerpagut, Brian Buus Pedersen taama oqarpoq.
Sulisitsisut pisortaata ineriartorneq pitsaasoq ingerlaannassasoraa, naak suliniutit maanna ingerlanneqartut naammassineqarumaartut. Tamannali Naalakkersuisut tungaannit eqeersimaartumik iliuuseqartoqarnissaanik pisariaqartitsissasoq, Brian Buus Pedersenip oqaatigaa.
- Sanaartornerup iluani ullumikkumut naleqqiullugu suliffissaqartitsinerulernissamut periarfissaqarpoq. Pilersaarusiortarneq ajorpallaaqaaq aningaasallu piffissap ilaani atorneqaratik Sanaartornermut Iluarsaassisarnermullu aningaasaateqarfimmiiginnartarlutik. Angusaqarluarluni Kalaallit Nunaata aningaasaqarnera ilorraap-tungaanut saatsigaanni, tamanna aaqqiissutissat ajornannginnersarissagaat isumaqarpugut. Tassalu sanaartornerup aqunnissaanut pikkorinnerulernissaq, pisortaq taama oqarpoq.
