Pisortaq: Umiarsuit takornariartaatit pillugit malersuineq unilli

Umiarsuit takornariartaatit pillugit malersuineq unitsissavarput, takorluukkatsinninngaanniimmi annertunerujussuarmik tapersiisarpoq.

Arctic Circle Businessimi pisortap, Jesper Schrøderip, tusagassiorfinnut nalunaarutitigut oqariartuutaa naatsunngorlugu taama oqaatigineqarsinnaavoq.

Nunatsinni umiarsuit takornariartaatit tikittarnerat pillugu piffissami qaninnermi oqallittoqarnerata isornartorsiuisoqarneratalu malitsigisaanik tusagassiorfinnut nalunaarut saqqummerpoq. Isornartorsiuinerit soorlu imatut nipillit ”peqqinnissaqarfik artukkerneqareersoq takornariartaassuarnit qaavatigut artukkerneqaqqippoq”, ”umiarsuit takornariartaatit najugaqarfinni inuiaqatigiinnut tapersiineranniit mingutsitsinerupput”, aamma ”takornariaqarnerup piniarneq innarlerpaat, Tunumi piniartut isumaqarput” tusagassiorfinni initusimapput.

Umiarsuit takornariartaatit nunatsinnut aatsaat taama amerlatigisut tikinneranni tamakku tamarmik pipput, Visit Greenlandimmi kisitsisaatai naapertorlugit 2023-mi umiarsuit takornariartaatit 480-it nunatsinnut tikinniarlutik nalunaarsimapput.

Oqallinnerulli assigiinngisitaartuunissaa amigaataavoq, Arctic Circle Businessimi pisortaq, Jesper Schrøder, najukkani inuussutissarsiornernik nukittorsaanermik sulialik taama isumaqarpoq.

Inuussutissarsiorfik isertitaqarfiulluartoq

Pisortap oqarnera naapertorlugu oqallinneq suliaqartunit imminnut tikkuartuuttunit taamaallaat ingerlanneqarpoq, tamannalu aaqqiissuteqartitsineq ajortoq, taanna oqarpoq.

- Kikkulluunniit imminnut tikkuartuukkaluarpata nunanilu allani umiarsuarnut ilaallutik allaanerusunik takornariartitsisartunut assersuussiniarsaralutik tamanna arlaannaataluunniit iluaqutiginavianngilaa, sisamanngormat tusagassiorfinnut nalunaarummi taama allappoq.

Isornartorsiuinermi eqqartorneqartut mumingalluinnartuanik suliaqarfik nunatsinni inuussutissarsiornerup iluani isertitsilluartarpoq.

- Umiarsuit takornariartaatit umiarsualivitsinnut tikittartut avammut tunisaqarnissamut periarfissatsialaapput, tamannali ullumikkut atorluanngilarput, taanna allappoq.

- Inuussutissarsiuteqarnermik ingerlatsisut amerlasuut umiarsuarnik takornariartaatinik aningaasarsiutiginnilluartartut amerlanerat oqaatigineqarsinnaavoq kiisalu nunatta karsianut iluaqutaaqisumik avammut tunisaqarnermi isertitsilluartarpugut. Taamaattumik oqallinnerup illua-tungaannaasiortumik ingerlanneqarnera imminiiginnarsinnaanngilarput, tassami paasisimasat killeqartut tunngavigalugit oqallittoqassappat takornariartitsinermut tamanna ajoqutaasinnaavoq, Jesper Schrøder taama itisiliilluni nangippoq.

Oqallinnerulli pingaaruteqarnera taassuma erseqqissarpaa pissutigalugu suliassaqarfimmi inatsisiliornissaq amingaatigineqarmat. Takornariaqarnerup annertusiartortup nunatsinnut iluaqutaanissaa nunattalu umiarsuit takornariartaatit tamarmik immikkut aningaasarsiorluarfiginissai inatsisip qulakkiissavaa.

Nunatta karsianut aningaasat amerlanerusut

Naalakkersuisullu tamanna aalajangiiffigissagaluarpassuk tamannarpiaq pissaaq.

Nunatta karsianut tuttussanik takornariartaassuarnut nunatsinni umiarsualivinni tulanngasunut akitsuusersueqqilernissamik nunattalu kommuuniisa taakku ilaasuinut akiliuteqartitsisalersinnaanissaannik inatsisissatut siunnersuut, Inatsisartut ukiaru siullermiissavaat.

Umiarsuit takornariartaatit soorlu illoqarfimmut tulakkaangata kommunit ilaasumut ataatsimut 50 koruunit tungaannut akiuliuteqartitsisalernissaat inatsisitigut periarfissaalissasoq, naalakkersuisut siunnersuutigaat. Siunnersuutaannili nunatta karsianut tuttussanik akitsuusersuilernissaq taaneqanngilaq.

Takornariartaassuit umiarsualivimmiinnermut akiliutigisartagaasa saniatigut marlunnik akitsuusersuisalernissamut taama siunnersuuteqarput.

Iluanaarutit annertupput najugaqarfinnullu tuttarlutik

Tusagassiorfinnut nalunaarummi Jesper Schrøderip takornariartaassuit nunatsinnut iluanaarutaasarnerannut Sisimiut assersuutitut atorpaa.

Pisortap oqarnera naapertorlugu 2019-mi takornariartaassuit Sisimiunut tikittut 40-t illoqarfimmut 30 millioningajannik isertitaqartitsisimapput, ukioq mannalu takornariartaassuit 72-it Sisimiunut tikissasut naatsorsuutigineqarpoq, taanna allappoq.

Taamaammat takornariaqarnerup malersorneqarneratigut suliaqarfik persarineqartoq pisortaq isumaqarpoq. Arctic Circle Businessip allallu takornarialerisut politikerit sinaakkusiarisartagaat malillugit sulisarnertik taassuma erseqqissaatigaa. Takornariaqarnermilu immikkoortumik peersiniaraanni taava suliffiit pitsaasut nunatsinnullu aningaasanik isaatitsisooqataanera aamma peerneqassapput

- 2019-imi umiarsuarnik kiffartuussinermi umiarsuarmut ataatsimut agguaqatigiissillugu 600.000 koruuningajaat isertitsissutaapput, takornariallu umiarsuarmut ataatsimut agguaqatigiissillugu 82.000 koruuninik isertitsissutaallutik.

Umiarsuit tikittartut amerlineruppata kisitsisit taakkua qaffassasut takorloorneqarsinnaavoq.

- KNI-p iluanaarutai amerlanerupput unnerlutik umiarsuit takornariartaatit sinneqartoornerunerminnut pissutaasut, sumiiffinni suliffeqarfiit aningaasaliissuteqartarnikuupput siornamullu sanilliullugu isertitaat amerlanerunikuullutik, Albatros Arctic Circle Kangerlussuaq umiarsuarsuit takornariartaatit ilaasui taarseraangata sullissisartuusut Hotel Kangerlussuaq pisiarinikuuaat, naggasiutitut taama allappoq.