Takornariarpassuit Peqqinnissaqarfimmut artukkiisut

Takornariartaassuit nunatsinnut aasakkut tikittartut amerlasaqaat.

Nunatsinnulli ukioq manna tikittut aatsaat taama amerlatigaat. 

Nunatta tuusintilikkuutaanik takornariaqarnera takornarialerisunut pisiniarfinnullu qularnanngitsumik qujarunnaraluaqisoq Peqqinnissaqarfimmut kalluaavoq.

Nunattami takornariarpassuaqarnera Peqqinnissaqarfiup suliassanik nammakkersorneqariaannarneranik kinguneqartoq, nunatsinni nakorsat peqatigiiffiat nalunaarpoq.

- Takornariartaassuarmik tusintilikkuutaanik ilaasulimmik tikittoqaraangat, ingammik Nuup avataani, sulisoqarneq eqqarsaatigalugu, inuppassuit tikinnissaannut piareersimasanngillat, taakkunani ilaasut ikiortariallit aamma amerlanngikkaluaraangataluunniit, nunatsinni nakorsat peqatigiiffiata siulittaasuata tullia Nicolai Hardenberg Larsen oqarpoq.

Naatsorsueqqissaartarfiup kisitsisaatai naapertorlugit takornariartaassuit nunatsinnut 2022-mi tikittut 376-iupput. Ukioq mannali tikittut marloriaatingajaraat. Takornariartaassuillu nunatsinnut ukioq manna tikittussat katillutik 626-usut, Visit Greenlandip kisitsisaatigigallagaanni erserpoq.

Takornariartaassuarmilu ilaallutik nunatsinnut tikittuni Peqqinnissaqarfimmit ikiortarialiusartut utoqqasaajuukkajupput.

- Takornariartaassuarni ilaasut tusintilikkuutaat ilarpassui uutoqqasaajuukkajuullutillu nappaatiliusartut Peqqinnissaqarfimmut artukkiipput,  Nicolai Hardenberg Larsen oqarpoq.

Allaffissorneq piffissartuutigisaqigaat

Nunatta takornariarpassuaqarnera Peqqinnissaqarfimmut kisimi artukkiinngilaq.

Nakorsiammi ilaat tuluttoorsinnaanngillat.

- Ilaat tuluttoorpiarsinnaanngingajapput. Tamanna paaseqatigiilluarnissamut akimmisitsisarpoq. Piffissarnartornaqalunilu kukkuluttoratarnissamut qaninnerulersitsisarpoq, Nicolai Hardenberg Larsen oqarpoq.

Akimmiffiilli taakkuinnaanngillat, taakkumi aamma pillugit allaffissorneq piffissartuutigisaqaat.

Atorfinitsitsisariaqarsimasut

Takornarianimi nakorsiani kikkut akiliisariaqanngillat kikkullu akiliissappat?

Tassa Peqqinnissaqarfiup tamatuma nunat tamalaat isumaqatigiissutaanni assigiinngitsuni akissutissarsiniarnera piffissartutigingaatsiartariaqartarpaa.

Taamaammat tamakkunuinnaq tunngasunik suliaqartussamik atorfinitsitsisariaqarsimapput.

 - Sillimmasiisarfiit attaveqarfiginerulertussaagatsigit, allaffeqarfipput nukittorsassallugu aalajangernikuuvugut. Immikkullu samminnittussamik sulisoqalernissarput iluassaqaaq. Tamakkuinnarnimmi suliaqartussamik atorfinitsitsiniarpugut, Peqqinnissaqarfiup pisortaa Tina Amondsen KNR-imut oqarpoq.

Tamatuma saniatigut Nuummi nakorsamik pigaartoqarnermi ataqatigiissaarisunngortitsipput.

Tassa Nuummi Dronning Ingridip Napparsimmaviani nakorsat ilaat takornariartaassuit ilaata nakorsamik ikiortissarsiornerani qanoq iliornissamut ataqatigiissaarisuussaaq.

Sianeriammi sumiiffinni allani nakorsat peqqissaasullu suliakkersorneqarpallaaqqunagit takornariartaassuillu ilaasumik ikiortarialimmik sumut nakorsiaassinissaannut ikiorluarsinnaanerujullagit taamaaliorlutik, Tina Amondsen oqarpoq.