Great Greenland Pisortanngortup amernik amerlanerusunik peqalernissaq sulissutiginiaraa

Pisortassatut toqqarneqartoq tassaavoq Preben Møller, Great Greenland A/S-imi pisortaagallartutut ukioq manna apriilimili ivertinneqartoq. Preben Møller suliffeqarfimmi pisortatut oktobarip aallaqqaataa aallarnerfigalugu pisortatut atorfinitsivinneqassaaq.

Preben Møller tunisassiortutut aqutsisutullu ukiorpassuarni misilittagaqarpoq, suliffeqarfimmilu amminik tunisinermiit sulisunik aqutsineq ilanngullugu ilisimaqarluarfigalugu.

Great Greenlandip amminik sulianik tunisassiai nunani tamalaani piumaneqaleraluttuinnarput, Great Greenland A/S-illu atisatigut atisalioriaatsinullu tunngatillugu nukittunerusumik inissisimalernissaa Preben Møllerip pingaarnertut suliarissavaa, amminillu pisiortorneq piniartut inuussutissarsiornerullu akornanni oqaloqatigiinneq pingaaruteqartinneqarluni:

- Suli amerlanerusunik amernik peqalernissarput pingaartilluinnassavara. Tunitsiviit sumiiffii naleqquttut amerlanerusullu misissorneqarnissaat pisariaqarpoq. Puisit amiinik niuerfimmi soqutiginninnerujussuaq ataavartinniassavarput aammattaaq puisit amiisa tunisassiarisartakkatta pitsaassusaat qularnaartuartariaqarlugit. Puisip amia tassaavoq suliffeqarfiup piuneranut tunngavik, Preben Møller oqarpoq.