Pisortani sulisut eqimattat arlallit akissarsiaqarnerulingajalersut
Atorfillit Kattuffiat (AK) aamma Aningaasaqarnermut Sulisoqarnermullu Aqutsisoqarfik ukiunut tulliuttunut tallimanut atuuttussamik nutaamik isumaqatigiissuteqaqqammerput.
AK tusagassiuutinut nalunaarummi allappoq.
Isumaqatigiissut isumaginninnermi siunnersortinut, sullissisunut, nakorsat allattaannut aamma klinikassistentinut, kigutigissaasunut kiisalu tandteknikerinut pisortani atorfeqartunut atuuppoq.
Akissarsianut pitsanngorsaataasussaq katillugu 9,53 procentiuvoq. Tassanilu tunngaviusumik akissarsianut qaffaaneq, meerartaarnermut atatillugu sulinngiffeqartarnerup pitsanngorsaavigineqarnera, soraarninngornermi atugassarititaasunik pitsanngorsaaneq, tapeqartitsisarnerup pisariillisarnera ilaapput.
Isumaqatigiissut 2023-mi apriilip aallaqqaataaniit atuuttussaavoq, taamaammat akissarsiat ulloq taanna aallarnerfigalugu kingumoortumik iluarsiivigineqassapput.
Isumaqatigiissummilu tassani sulisut pineqartut assigiimmik soraarnerussutisiaqalissapput, sulisitsisoq taamaalilluni tamanut 10 procentimik akiliuteqartalissalluni.
Tapeqartitsinerit allanngortinneqassapput taamaalillutik pisariinnerulissallutik. Ilaatigut tapit arlallit ataatsimoortinneqassapput, ilaat atorunnaarsinneqassapput – sulisulli tapinik taakkuninnga pissarsiaqartareersut tamanna annaasaqaatigissanngilaat.
Sulisut ilaat aamma suliartoqquneqaratarsinnaanermut tapeqalissapput. Suliartoqquneqaratarsinnaanermullu pisussaaffik tamanut assigiimmik atuutissaaq, sulisut ataasiakkaat taamaalillutik kvartalimut nalunaaquttap akunnerini 37-ini imaluunniit 52-ini suliartoqquneqaratarsinnaanermut tapeqalissallutik.