AK-mi siulittaasoq Dina Olsen.Assi: Atorfillit Kattuffiat / Dina Olsen

Atorfillit Kattuffiat: Isumaginninnermik siunnersortit uippakajaarput

Isumaginninnermik siunnersortit amerlasuutigut uippakajaartutut misigisimasartut misissuinerup nutaap takutippaa.

Isumaginninnermik sullissisut 70 procentiisa uippakajaarneq sapaatini akunnerni kingullerni marlunni nalaassimavaat.

Pingajorarterutaasalu misigigajuppaat.

Atorfillit Kattuffiata isumaginninnermik suliaqartuni ilaasortanut immersugassatut nassiussaanik misissuinermi tamanna inerniliutigineqarpoq. Kattuffik tusagassiuutinut nalunaarummi taama allappoq.

Sulianik isumaginnittut, isumaginninnermik siunnersortit isumaginninnermillu suliaqartut misissuinermi peqataasut, Atorfillit Kattuffiat (AK) nalunaaruteqarpoq.

Kisitsisit kattuffiup 2020-mi misissuinerani kisitsisinut assingupput. Taamani AK-mi ilaasortat pingajorarterutaasa uippakajaarneq piffissami sivisunerumi atugarisimavaat. Misissuinermi akissuteqartut 80 procentiisa sulinertik uippakajaarnerminnut pingaarnertut pissutaanerarpaat.

AAMMA ATUARUK Inunnik isumaginninnermi suliallit akornanni pingajorarterutaannaat ilinniarsimasuupput

-  Suliaqarpallaarneq siullertut, taavalu immaqa sulianut sunniuteqanngippallaartarneq, taavalu qulaatinnarluni aalajangiisoqartarnera, AK-mi siulittaasoq, Dina Olsen KNR-imut oqarpoq.

Immersugassamik apersuineq: 

Misissuinermi 49-t akissuteqarput.

Atorfillit Kattuffiata ilaasortat 80-it nassiussivigai.

Akissuteqartunit 49-nit 70 procentit tassa isumaginninnermik suliaqartut 34-t uippakajaarneq ulluni suliffiusuni 14-ini kingullerni nalaassimavaat.

Suliffimmi innimiilliorfigineqarneq

Isumaginninnermi siunnersortit tallimaagaangamik ataatsip suliffimminni innimiilliorfigineqarneq nalaattarpaat. Innimiilliorfigineqarneq pingaartunit sumiiffinnit marlunneertarpoq – ataaeq inoqatinut attaveqaatitigut aappaalu suliffimminni ujartorneqarnikkut.

- Sulisitsisut tungaaninngaanniit soorlu immaqa una  aallunneqarpallaanngilaq sulisup imaajartarnissaa, ilaasa suliffimmi suliat ilungersunartut sunniutaat minnerpaaffianiitinniarlugu iliuuseqartarnerat annikitsoq, soorlu nammineq aamma taanna tikkuarnikuuaat, Dina Olsen oqarpoq.

- Saaffiginnissutigisariaqarpagut aamma inernerat takutillugu, taavalu isumaqatigiinniarnissatsinnut aamma sakkugisinnaavarput, qanoruna isumaqatigiissutitigut immaqa pinaversaartitseqataasinnaanersugut, Dina Olsen oqarpoq.

Ilinniarsimasut amigaataasut

Kommunini arlalinni isumaginninnermik ilinniagaqarsimasut amigaataapput. Tamanna KNR-ip kommuninit paasissutissarsiaani kisitsisit decembarimi takutippaat.

Assersuutigalugu Kommune Kujallermi isumaginninnermi siunnersortit 16-it pisariaqartinneqarput, maannamullu quliinnaat atorfeqarlutik. 16-init taakkunannga marluinnaat isumaginninnermik ilinniarsimasunit atorfigineqarput.

AAMMA ATUARUK Meeqqanik inuusuttunillu isumaginnittoqarfiit suliaat sulisuisa amerlassusaannut naleqqiullugit amerlavallaarujussuartut

Kommuneqarfik Sermersuumi isumaginninnermi atorfeqartunit 37-nit 20-t suliaqarfimmut tassunga tunngasumik ilinniagaqarput. Tassa 54 procentit procentiisa missaat. Amerlanerpaalli Nuummiipput. Tasiilami assersuutigalugu isumaginninnermi siunnersortinit qulingiluanit ataasiinnaq isumaginninnermik ilinniarsimasuuvoq.

Sulisussaaleqineq sulisut suliffimmi atugassarititaannaanut sunniuteqarneq ajorpoq. Tamanna aamma meeqqat inuusuttullu eqqortumik ikiorneqanngitsoornerannik isumaqarsinnaasoq, isumaginninnermik siunnersorti, Ilisimatusarfimmilu isumaginninnermik ilinniarfimmi aqutsisoq, Sara Abelsen KNR-imut januaarimi oqarpoq:

- Innuttaasormi isumaginninnermut tunngasumik ilinniarsimasuunngitsumit sullinneqaraangami malittarisassat naapertorlugit ilitsersorneqarlunilu siunnersorneqarnissaagalua isumaginninnermulluunniit tunngasumik ilinniarsimasunit sullinneqarnissaagalua pinngitsoortarput, taanna oqarpoq.

 

Assitaliussap meeqqanut inuusuttunullu susassaqarfimmi isumaginninnermik suliaqartut sulianik qassinit tigummisaqarnersut takutippaa. Kisitsisit kingulliusut nunatsinni kommunit nassiussaraat. Assi: KNR.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl