Pisiniarfiit piumaneqarluartartut nioqqutigiunnaarnissaat isumaliutigigaat
Saftit, imeruersaatit energit, juicet danskvandillu Brugsenip Pisiffiullu 2024 aallartippat tuniniarunnaarnissaat isumaliutigaat.
Tamanna Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup niuertarfiit utertitseriaatsimut nutaamut ukiup nutaap nikinnerani atuutilertussamit ilaatinneqanngikkallarnissaminnik piumasaqarneranik itigartitsinerata kinguneranik pivoq.
Læs også Returpantsystem: Dagligvareforretninger får afslag på dispensationsansøgning
Niuertarfissuarnut marlunnut sinniisuusuni Sulisitsisuni allattoqarfimmi pisortaq, Karsten Lyberth-Klausen taama aarlerisaaruteqarpoq.
- Brugsenip Pisiffiullu Nuuk Imermit nioqqutissatoqqanik taamaallaat tuniniaanissartik isumaliutigaat. Taakkumi utertitsisarfinnut maannakkut atuuttunut kisimik utertinneqarsinnaapput. Utertitsisarfiit nutaat inissinnissaata tungaanut imeruersaatit eqeersaatitallit (energidrik), naatitanik smoothieliat, imeq kulsyrilik, Ribenalu tunisaajunnaarallariataannaapput, taanna oqarpoq.
Karsten Lyberth-Klausenip oqarnera naapertorlugu pisiniarfiit tuniniakkaminik utertitsiffigineqarsinnaanissamut taamaallaat pisussaaffeqarput. Taamaammat puiaasat malittarisassanut nutaanut ilaasut Brugsenimi Pisiffimmiluunniit tuniniarneqanngippata utertinneqarsinnaatissanngilaat.
Naalakkersuisoqarfik pissutsinut malinnaanngitsoq
Pisiniarfiit ukiup nikinnissaanut angumersisinnaassagunik malittarisassat nutaat kingusinnerpaamik septembarip aallaqqaataani piareereersimasariaqartut, naalakkersuisoqarfimmut paasissutissiissutiginikuugaluaraat Karsten Lyberth-Klausenip oqaatigaa.
Tamanna Tomrap utertitsisarfinnik tunisassiortup maskiinanik taama amerlatigisunik qaammatialuinnaat sioqqullugit ilisimatinneqaruni tunniussisinnaannginneranik ilaatigut pissuteqarpoq.
Tamanna pissutigalugu utertitsiviit nutaat Brugsenip Pisiffiullu pisiniarfiini tamani piareerluarnissaat qaammatialunnik sivisussuseqarsinnaavoq.
Taamaammat pisiniarfiit immikkut akuersissuteqarfigineqarnissamik qinnuteqarnertik akuerineqanngimmat aamma eqqarsarnartoqartippaat.
- Naalakkersuisoqarfiup utertitsiviit qanoq ittut inniminnerneqarnissaannik oktobarimi aatsaat ilisimatitsinerat tupinnarpoq. Tamanna namminneq qaammatit arfinillit sinnerlugit sulissutigaat, taamaakkaluartorli uagut qaammatit marluk pingasut ingerlaneranni piareersimanissarput naatsorsuutigaat, Karsten Lyberth-Klausen oqarpoq.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup itigartitsinermini ’susassaqartut allat utertitsivinnik imaluunniit nammineq assammik aaqqiissuteqarnikkut januaarip aallaqqaataani piareersimanissartik naatsorsuutigigaat’ tunngavilersuutigaa. Taamaammat Brugsenip Pisiffiullu tamanna angumerisinnaassagaat naalakkersuisut nalilerpaat.
Assaat atorlugit utertitsisitsisarnissaq qularutigigaat
Pisiniarfiit ataasiakkaat utertitseriaatsimik nutaamik qanoq aaqqiissuteqarnissaq namminneq aalajangissavaat. Utertitsisarfinni maskiinat namminerluunniit assaat atorneqarsinnaapput.
Aaqqiissulli taanna Pisiffiup Brugsenillu qularutigaat.
- Aaqqiissut taanna suliffeqarfiit naleqquttuusorinngilaat. Tamannami pisiniarfiit utertitassarpassuarnut isumaginnittussanik sulilersitsisariaqarnissaannik isumaqassaaq. Suliassaq tamanna suliffeqarfinnut oqitsuinnaanngilaq, Karsten Lyberth-Klausen oqarpoq.
Brugseni Pisiffillu kisimik utertitsisarfinnik nutaanik 2024-mi januaarip aallaqqaataani piareersinnaannginnertik nalunaarutigaat. Taamaammat pisiniarfiit allat nioqqutissanik taakkuninnga pisiffigineqarsinnaassallutillu utertitsiffigineqarsinnaassapput.
