Biologi: Pisassiissutit amerlavallaarpata aalisarneq innarlerneqarsinnaavoq
Aappaagumut saarullittassiissutissat biologit innersuussutaannit amerlanerungaatsiarnissaat aalisarnermut naalakkersuisup Hans Enoksenip AG-mit apersorneqarnermini ilimasaarutigaa.
Innersuussutigineqartulli malinngikkaanni aalisarneq piffissami sivisunermi innarlerneqarsinnaasoq, Pinngortitaleriffimmit oqartoqarpoq.
- Biologit innersuussutaat malinngikkaanni aalisarneq imminut akilersinnaajunnaariartussaaq saarulliillu ikiliartorlutik. Taava ima ikilitigissapput, aningaasarsiorfigalugu saarullinniartoqarsinnaajunnaarluni, amerlanerulernissaallu ukiorpassuarni utaqqineqartariaqarluni.
Pinngortitaleriffimmi aalisakkanut qalerualinnullu immikkoortortaqarfimmi pisortaq, Helle Siegstad taama oqarpoq.
Ukioq mannamut saarullittassiissutit biologit innersuussutaannit pingasoriaammik ukiup naanerani amerlanerulerput. Aappaagumullu saarullittassiissutit biologinit innersuussutigineqartuninngaanniit amerlanerungaatsiarnissaat aalisarnermut naalakkersuisoq, Hans Enoksen AG-mit apersorneqarnermini ilimasaarivoq.
Takuneqartartut tusarneqartartullu tunngavigalugit saarulliit ikilivallaarnissaat ernumaginagu, aalisarnermut naalakkersuisup oqaatigaa.
Maannakkullu saarullippassuaqartoq biologinit aamma oqaatigineqarpoq. Saarulliilli ukiuni tulliuttuni ikilisinissaat Pinngortitaleriffimmit ilimagineqarpoq.
- Aalisakkat aalisarneqarsinnaasut ikiliartorput. Maannakkut aalisarneqartut ukiuni '09-mi, '10-mi '11-milu suffinermeersut amerlasoorpassuupput. Taakkuli maanna tammariartulerput, ukiunilu '12-imi, '13-imi '14-imilu suffinermeersut maanna aalisarneqartussanngulerput, taakkualu ikinnerupput, Helle Siegstad oqarpoq.
Saarulliit imartanut allanukannginneranni aalisarneqartariaqartut, Hans Enoksen aamma oqarpoq.
- Kina oqarpa saarulliit imartatsinniiginnassasut? Islandimiut oqaluttuuttarpaatigut, saarulliit Nunatsinnit ikaartut aalisartaritik, Hans Enoksen AG-mut oqarpoq.
Islandimukartartunillu saarulleqartoq Pinngortitaleriffimmit oqaatigineqarpoq. Allanilli aamma eqqarsaateqartoqartariaqartoq, Helle Siegstadip oqaatigaa.
- Islandimi suffisarfimminnukartartunik saarulleqarpoq, taakkuli ilaat Tunumut aamma suffiartortarput. Saarulliit suffisut kinguaariit tullii qajannaassisissavaat, taamaasillunilu Nunatsinni saarullinniarneq qajannaassisissallugu. Saarulliit Tunumi tukertut Islandimeersullu amerlasuut Nunatta imartaani peroriartussapput, taamaasillutillu Nunatsinni aalisarneqarsinnaassallutik, Helle Siegstad oqarpoq.
AAMMA ATUARUK Sinerissap qanittuani saarullittassiissutit ilaneqartut
