Ingerlatseqatigiiffiit naalakkersuisunik isorinningaatsiartut: Pisassiissutinik neqeroorusiortitseqqittoqarnissaa piumasarigaat

Tamanut assigiimmik atugassaqartitsiffiusumik neqeroortitsiniarnerusussaagaluarpoq erseqqissunik malittarisassartalik kinaassusersiorpalaanngitsumillu pointilersuinertalik.

Malittarisassanilli neqeroorusiortunillu nalilersuineq naalakkersuisut imaani pisassiissutissiineranni maanna akerleriissutaaleraluttuinnarput.

Naalakkersuisut SiKu Trawl aamma Qeqertalik Seafood qaleralinnik, saarullinnik nataarnanillu pisassiissutinnannissaat aggustip 18-ianni aalajangerpaat.

Najukkamittut imaani aalisarnermut peqataalernissaata kissaataanera Aasiannilu suliffissanik tunisassiortoqarnisaanillu qulakkeerinninnissaq taama aalajangernerminnut ilaatigut tunngavilersuutigaat.

Ingerlatseqatigiiffiilli marluk pisassiissutinik tunineqanngitsut maanna akerliliipput. 

Inua Fisheries Greenlandip aamma Halibut Greenlandip Naalakkersuisut piumasaqaatit ersarissumik allassimanngitsut malillugit pissutsinik naliliisimasoraat.

Tamarmillu neqeroorusiortitseqqeqqusipput.

‘Piumasaqaatit maleruaqqusallu piunngitsut’

Halibut Greenlandip tamanna tusagassiuutinut nalunaarummi sakkortuumik isornartorsiorpaa. 

Naalakkersuisut ingerlatseqatigiiffimmik nunap ilaani pisariaqartinneqarluinnartumik aalisarnermik inuussutissarsiornikkullu ineriartortsitsinermik nukittorsaaqataasinnaasumik qinnuteqaatinik toqaaniarnerminni pingaartitsisimanerat, ingerlatseqatigiiffiup allappaa.

Tamanna Halibut Greenlandip qinnuteqarfissamut killigititap qaangiutereernerata kingorna aalajangiinissamut tunngavissatut atorneqarsinnaannginnerarpaa. 

- Naalakkersuisut neqeroorusiortitsinerminni piumasaqaataasut aqqaniliusut, naalakkersuisoqarfiup neqeroorusiortitsinerminut atatillugu piumasai, avaqqullugit aalajangipput, ingerlatseqatigiiffik tusagassiuutinut nalunaarummi allappoq. 

Halibut Greenlandip piumasaqaatit maleruaqqusallu qinnuteqartunut tamanut assigiinnissaat kinaassusersiorpalaanngitsumillu aalajangiinissamut tunngavissat , naalakkersuisoqarfimmit aalajangersakkat naapertorlugit nalilersorneqarnissaat erseqqissaatigaa.

- Qinnuteqartut tamarmik piumasaqaataasut maleruagassallu assigiit toqqammavigalugit nalilersuiffigineqartussaapput, piumasaqaatit maleruagassallu piunngitsut toqqammaviginagit.

Taamaalilluni neqeroorusiortitsinerup tunngavippiaa isornartorsiorneqarpoq. 

Isiginiagassat allat tamatuma kingorna aalajangiinissamut pingaaruteqalersimappata, Halibut Greenlandip pointinik aaqqissuussinerup aalajangiinissamullu tunngavissat aalajangersariikkat sumut atorneqassanersut apeqqutigaa.

Inua Fisheries aamma taama apeqquteqartoq

Inua Fisheries pisortatigoortumik akerliliissummik inatsisitigut ikiorneqarlutik naalakkersuisunut aamma nassiussivoq. 

Ingerlatseqatigiiffiup pisassiissutit SiKu Trawimut tunniunneqartut: Kitaani qalerallit 2.468,5 tonsit, saarulliit 1.950 tonsit nataarnallu 166,6 tonsit, qinnutigisimagaluarpai. 

Ingerlatseqatigiiffiit arfineq pingasut pisassiissutit taakku qinnutigisimavaat, naalakkersuisullu oqarnerat naapertorlugu, arfinillit piumasaqaatinik malinnissimapput. 

Inua Fisheriesip naalakkersuisut nalilersukkatik tamanut saqqummiutereerlugit inaarutaasumik aalajangiisimanerat apeqquserpaa. 

Ingerlatseqatigiiffiup naalakkersuisut tunngavittut ‘ataatsimut naliliinerat’ qinnuteqartitsinerup naliliiffigisassatut piumasaqaataanni nassaassaajunnaarsimanerarpaa.

Piginnittut amerlassusaat siammasinnerallu tassani aamma pineqarput. 

Inua Fisheriesip 2025-mi qinnuteqartitsinerup taamaatiinnarneqarneranit, ‘ersarissuseq, assigiimmik pineqarnissaq aalajangiinermullu tunngavissaqarluarnissaq’ qulakkeerniarlugu 2026-mi qinnuteqartitseqqittariaqarnissamut erseqqissaanerat innersuussutigaa. 

Taamaattumik naalakkersuisut piumasaqaatit namminneq erseqqissarsimasatik uani tunniussinermi nutaami malissimannginnerinut isornartorsiuineruvoq. 

Suliniuteqartussat nutaat

Naalakkersuisut suliniuteqartussanik nutaanik periarfissiinissap pingaartinneqarnera erseqqissaatiginikuuaat.

SiKu Trawl ingerlatseqatigiiffittut pilersinneqaqqammerpoq, naalakkersuisullu ingerlatseqatigiiffiup ineriartortitsinissamut pilersaarummini, kujataani Narsamilu aalisarneq inuussutissarsiornermilu ineriartortitsinerup ilaatigut qitiutinneqarnera erseqqissarpaat.  

Naalakkersuisut SiKu Trawl avataani aalisarnermi piginnittunik nutaanik ilanngussinera, aalajangivinnginnerminni immikkut ittumik pingaartinneqarsimanera allappaat.  

Ineriartortitsinissamullu pilersaarut taannarpiaq Inua Fisheries-ip maanna apeqqusigaasa ilagaat. 

Assersuutigalugu Narsami tunisassiorfittaarnissamik pilersaarut toqqaaniarnermut pingaaruteqarsimappat, Inua Fisheries-ip tamanna neqeroorusiortitsinermi najoqqutassiani sumi allassimanera suliniullu piviusunngortinneqanngippat aalisagartassiissutit suneqarnissaat paaserusuppaa.

Inua Fisheries-ip Kommune Kujallermi borgmesterip sumiiffimmi ineriartorneq pillugu naalakkersuisunut ammasumik allagaa tamatumunnga atatillugu aamma maluginiaqquaa.

Nunap immikkoortuinik eqqarsaatiginninneq

Halibut Greenlandip tamatuma saniatigut naalakkersuisut tunngavilersuutaat aalajangiinermut akerliusutut atorniarsaraa.

Ingerlatseqatigiiffiup sulisut 141-t tamarmik nunatsinni najugaqartuusut paasissutissiissutigaa. Ingerlatseqatigiiffiup tusagassiuutinut nammineq nalunaarutaa naapertorlugu aningaasaliissutit 90 procentiat sinerissap qanittuani aalisartunit pigineqarpoq, piginneqataasuniillu 141-nit 121-t aalisartuupput.

Halibut Greenlandip ingerlatseqatigiiffik qinnuteqartunit arfinilinnit kisiartaalluni suliami ingerlaqqittoq namminerisaminik aalisakkeriveqareerpoq.

Tusagassiuutinut nalunaarut naapertorlugu ingerlatseqatigiiffiup tunisassiat suliareqqinneranik naleqarnerulersitsiniarluni aalisakkerivik alliliiffiginiarlugu pilersaarutigaa.

Ingerlatseqatigiiffiit tunngavilersuutaat taamaammat ersarippoq: Naalakkersuisut kalaallit siammasissumik piginneqataanissaannik, najukkami naleqartitsinermik pilersitsisoqarnissaanik aalisarnermillu ineriartortitsisoqarnissaanik kissaateqarpata ingerlatseqatigiiffik taava tunngavissaqarluartoq, Halibut Greenland isumaqarpoq.

Aasianni aalisakkerivik

Naalakkersuisut aalajangiineranni Aasianni pissutsit immikkut eqqarsaatigineqarput.

Qeqertalik Seafood nunatta kitaani 2.468,5 tonsinik qaleralittassiissuteqarfigineqarlunilu tunumi 5.000 tonsinik saarullittassiissuteqarfigineqarpoq.

Paasissutissat naapertorlugit ukiumut qaleralittassiissutinit minnerpaamik 25 procentit Aasiannut ukiuni qulini tulliuttuni tulaanneqassapput.

Naalakkersuisut oqarnerat naapertorlugu tamanna aalisakkeriviup ukioq tamaat ingerlaartissinnaavaa. Naalakkersuisut oqarnerat naapertorlugu Qeqertalik Seafoodip pilersaarutaata ukioq kaajallallugu suliffiit 54-it 59-llu akornanniittut qulakkiissavai.

Naalakkersuisut taamaalillutik nunap immikkoortuanut suliffissaqartitsinermullu tunngasut pingaartippaat.

Neqerooruteqartitsinermili piumasaqaatinut atatillugu apeqqutit tamakkua qanoq pingaartinneqartigisinnaanersut aaqqiagiinngissuteqarnermi qitiupput.

Ukiuni qulini qaleralittassiissutit 

Suliaq Inua Fisheriesimut pisassiissutit ataasiinnaat pillugit unammillernerunngilaq.

Nunatsinni aalisakkanik ataatsimoorussassanik naleqarluartunik atuinermut tunngassuteqarpoq, tassunga qaleralittassiissutit ukiuni qulini atuuttussat ilaapput.

- Taamaammat suliffeqarfiit taama nalilinnik tunniussinermi piumasaqaatit ilisimaneqareersut tunngavigineqarnissaannik tatiginninnissaat pingaaruteqarluinnarpoq.

Inua Fisheriesip siulersuisuisa siulittaasuat, Jens Peter Larsen ingerlatseqatigiiffiup tusagassiuutinut nalunaarutaani oqarpoq. 

Suliarlu tassani aamma immikkuullarissunngorpoq.

Ingerlatseqatigiiffiit marluk ammasumik ingerlatsinissamut naligiissitsinissamullu piumasaqaatit malinneqanngitsut maanna oqaatigaat.

Naalakkersuisut ajugaasunik malinnaaffiginnissasut

SiKu Trawlip aamma Qeqertalik Seafoodip neqerooruteqartitsinermi piumasaqaatit maleruaqqusallu malinneraat Naalakkersuisoqarfiup ingerlaavartumik malinnaaffigissagaa, Naalakkersuisut paasissutissiissutigaat.

Tassa imaappoq suliami immikkoortup tulliani ajugaasut ineriartortitsinissamut pilersaarutiminnik qinnuteqaatiminnilu neriorsuutiminnik naammassinninnersut pineqarsinnaavoq.

Naalakkersuisulli apeqqummik tunngaviunerusumik isummerfigisassaqalereerput:

neqerooruteqartitsinermi piumasaqaatit pisassiissutissarsiniuunnermi aalajangiisuuppat - imaluunniit inaarutaasumik naliliinermi nunap immikkoortui suliffissaqartitsinissarlu qinnuteqaateqartut unammillissutigisinnaanngeriigaat aalajangiinissamut pingaartinneqarpat?

Inua Fisheries aamma Halibut Greenland apeqqummut tassunga maanna akissuteqaqqusipput.

Ingerlatseqatigiiffiit tamarmik assigiimmik piumasaqarput: Qinnuteqartut tamarmik assigiimmik atugassaqartinneqarlutillu piumasaqaateqarfigineqarfigineqarlutik nutaamik neqerooruteqartitsisoqarli.

KNR-ip Aalisarnermut, Piniarnermut, Nunalerinermut Namminerlu Imminullu Pilersornermut Naalakkersuisoqarfik aamma ministerip allattaa aalajangiinermut atatillugu paasiniaaffigai, saaffiginnissutigulli suli uterfigeqqinngilaat.