Pipaluk Niviarsiaq Smillap Hollywoodimi isiginnaagassiarineqarneranut allaatiginneqataassasoq
Nunani tamalaani filmiliortarfissuup Niviarsiaq Smilla apullu pillugit isiginnaagassiornissani soqutigaa.
Danskisut oqaluttualiaq atuakkiortumik Peter Høegimit 1992-imi atuakkiarineqarpoq. Oqaluttualiaq kingornatigut isiginnaagassiamik ilitsersuisumit Bille Augustimit 1997-imi isiginnaagassiarineqarpoq.
Oqaluttualiarlu maanna isiginnaagassiarineqaqqissaaq. Tamatumuuna tv-kkut nangeqattaartartuarineqassalluni, tassanilu tyskit filmiliortarfiata Constantin Filmsip nangeqattaartartuliaralugu isiginnaagassiarissavaa.
Isiginnaagassiornissamut tuluk isiginnaagassiamik ilitsersuisartoq, Amma Asante ilitsersuisussanngortinneqareerpoq. Taanna HBO-p isiginnaagassiaani tusaamaneqarluartumi ”The Handmaid’s Tale”-imi ilitsersuisuuvoq. Taannalu maanna kalaallimik atuakkiortumit, Pipaluk K. Jørgensenimit ikiorneassaaq.
Pipaluk K. Jørgensen pillugu
- Pipaluk K. Jørgensen 39-nik ukioqarpoq namminerlu isiginnaagassiortarfimmik Nuummi Karitas Productionsimik piginninnikuulluni.
- Tassanilu tv-mut, isiginnaartitsinerlu isiginnaagassiornermillu suliaqarluni.
- Aamma nammineq Anori isiginnaagassiaraa.
- Taassuma nunat tamalaat akornanni isiginnaagassiornissaq aallunniarlugu isiginnaagassiorfini ukioq manna matuaa.
- 2020-mi UnoFilm ApS pilersippaa. Tassanilu isiginnaagassiamik ilitsersuisuuneq isiginnaagassiamillu allaatiginninneq suliaqarnissaq ukkatariniarlugu.
- Ukioq mannalu Emile Hertling Péronard suleqatigalugu aallartillugu.
Pipaluk K. Jørgensen tyskit isiginnaagassiorfianut nangeqattaartartuliap immikkoortuisa ilaanni allaatiginneqataanissaminut isumaqatigiissusioqqammerpoq.
Aammattaaq isiginnaagassiorfimmut ukiup ataatsip missaani siunnersuisuussaaq.
Nangeqattaartartuliap immikkoortortaa, Pipaluk K. Jørgensenip allaatiginneqataaffigisassaaq nunatsinni pisuussaaq.
Tamannalu Pipaluk K. Jørgensenip periarfissaqarfigalugu nuannaarutigilluinnarpaa. Tamanna kinaassutsiminut tunngavoq – namminerlu kalaaleqatiminut nunagisaminullu tunnganerani allaatiginneqataanissani pingaartilluinnarpaa.
- Constantinip tassunga samminera pillugu nuannaarlungalu ataqqinartippara, alloriarneq pingaartorujussuuvoq.
- Isiginnaagassiornermit nunap inoqqaavisa oqaluttuassartaannik isiginnittoqalersoq taakkunanngalu piginnaasat isigineqartut isumaqarpunga.
Nunanit tamalaanit soqutiginnittunut ammaasoq
Pipaluk K. Jørgensen manuskriptiliornermik ukiuni aqqaneq-marlunni kingullerni suliaqarpoq. Taamaammat tv-kkut nangeqattaartartuulersussami allaatiginninnissamut piareersimasutut misigisimavoq.
- Aap! Nunat tamalaat akornanni peqataanissamut anguniakkama ilaasa kiisami angunera nuannaarutigaara, Pipaluk K. Jørgensen oqarpoq.
Tv-kkut nangeqattaartartuliaq Niviarsiaq Smilla apullu Danmarkimi nunatsinnilu immiunneqassaaq. Isiginnaagassiami susoqarnissaa isiginnaagassiornerullu qaqugu aallartinneqarnissaa Pipaluup oqaatigisinnaanngilaa.
- Suliaqaqataanermi takutitsinera uannut pingaaruteqarluinnarpoq. Tamanna nunat tamalaat akornanni suliaqarnissannut matorpassuarnik ammaasinnaavoq, Pipaluk K. Jørgensen oqarpoq.
- Oqaluttuami allaatiginneqataasutut siunnersortaannaanermit sunniuteqarnerussaanga. Taamaammat oqaluttuap sumut ingerlasinnaaneranut oqaaseqartoqarsinnaavoq.
- Siunnersortaaginnarnata iluarsaassisuuginnarnalu suliaqarnissarput piffissami sivisuumi sulissutigaara. Uagut aamma sunniuteqaqataassaagut. Kisianni aamma pikkoriffigineqassaaq. Piffissamillu atuiffiuvoq, maannali tamanna ammariartulersoq misigisimavunga.
