Ullormit unnuamiillu nalunaarutit: Pinngortitaq politiit qatserisartullu sulinerannik akimmissaarisoq
Ulloq unnuallu ingerlanerani pinngortitami nukiit oqartussaasunik ulapititsipput.
Inneq imerlu qatserisartunut politiinullu ilungersortitsisimapput.
Tassami arfininngormalli Qaqortumi eqqaavissuarmit aallartittumik ikuallanneq qatserisartunit qamisarneqalerpoq.
Qamiterilluni sulineq sapaatiummat ullaap tungaa taamaatippoq. Tassanngaanniilli nillorsiineq annertunerusoq ingerlanneqarsimavoq.
Sulinermili ippassaq annikinnerusumik utersaartoqartoq Kalaallit Nunaanni Politiini pigaartut pisortaat Ole Hald ilisimatitsivoq:
- Qatserisartut annikinnerusumik ikummartooqqinnermik ippassaq qamisaapput. Pujoq qummut miiterit marlussuit tikillugit takuneqarsinnaasimavoq. Taamaammat sapaatip akunnerata naaneranisut sakkortutiginngilaq, oqarpoq.
Ole Hald oqaluttuarpoq, nillorsiinermi qatserisartut sulinerminni 80 procentit tikissimagaat, ikuallassimasut avissaartinniarneqarlutik.
Kommune Kujallermi borgmesteri Stine Egede ippassaq aamma oqarpoq ikuallanneq qaminneqarsimasoq, tamatumanilu ikuallannermut atatillugu qatserisartut namminnerlu piumassutsiminnik sulisimasut iliuuseqarsimanerannik qutsaveqarfigalugit:
- Ulluni marlunni qamiterisoqareerluni ullormilu ataatsimi nillorsiisoqareerluni ikuallanneq qaminneqarpoq. Iluarsaassinissaq tullinnguuppoq. Ikuallanneq taamak annertutigisoq ulluni marluinnarni qaminneqarsinnaasimammat qujaniarnaqaaq, oqarpoq.
Sialuk tillinnerillu
Ilutigitillugu Qaanaami mittarfimmut aqqusineq sialummit ajoquserneqarpoq. Taama Kalaallit Nunaanni Politiinit Ole Hald oqarpoq:
- Qanoq annertutiginersoq suli ilisimanngilarput. Suliassaq kommunimi oqartussanut ingerlateqqinneqarpoq suliassarlu massakkumiit isumagissallugu, oqarpoq.
Kingullerlu, minnerunngitsumilli, Nuummi umiarsualivimmit angallatit arlaqartut avalassimanerat pillugu oqaluttuat inuit internetsimi attaveqaataanni ingerlaarsimasut, pigaartut pisortaat Ole Hald ilisimatitsivoq:
- 22.16 nalunaarfigineqarput angutit inuusuttut pingasut angallammik aallartut. Ilutigitillugu angallatit umiarsualivimmiittut arlaqartut matui ammarneqarsimasut takuneqarsimapput.
Illoqarfimmili angallatini tillinniartoqarsimaneranik suli nalunaartoqarsimanngilaq, politiilli innersuussutigaat angallatigisamit tammaasaqartoqassanersoq imaluunniit unnuap ingerlanerani tikilluaqqusaanngitsunik pulaartoqarsimanersoq misissoriartoqqullugit.
