Arctic Youth Summit Pinngortitaq paarilluarnerulissavarput

Pinngortitaq paarilluarnerusariaqarparput innuttaasullu tamanna pillugu eqeersimaarnerulertariaqarput. Julie Lynge Ezekiassen Arctic Youth Summitimi taama ilaatigut oqariartuuteqarpoq. Tassani issittumi pissutsit oqaluuserineqarput.

- Uanga isiginiarnerusara uaniikkami nunatsinni ingammik inuiaqatigiit qanilluta mikilluta pigaluarluta ullutsinni tusarsaavallaanngitsoq takussaavallaanngitsorlu, una soorlu issittumi pissutsit, silaannaap allanngoriartornera, qanoruna iliorluta pinngortitaq paarilluarnerusinnaagipput?, Julia Lynge Ezekiassen, Ilimmarfimmi inuiaqatigiilerinermik ilinniartoq oqarpoq. 

Inuusuttut Issittumi pissutsinut tunngasuni tusaaniarneqarnerulernissaat anguniarlugu Arctic Youth Summit pilersinneqarpoq.

Arctic Youth Summit:                                                  Inuusuttut sammisaat pingasunut avinneqarput:                    - Politikerinut oqartussaasunullu allanut saaffiginnittumik nalunaarusiaminnik saqqummiineq. Issittumi pissutsit pillugit oqallinnermi inuusuttut nipaat tusaaniarneqarnerusariaqartut, oqariartuutit pingaarnersaasa ilagaat.                                                        - Isiginnaagassiaaqqamik sananeq, tassani inuusuttut oqariartuutitik naalisarlugit namminneq oqaatsitik atorlugit immiuppaat. 
- Takutitsineq.Nunap inoqqaavisa ileqqutoqaat takutitsissutigineqarput. Taamaaliornikkut ileqqutoqqat inuiaqatigiinnit maluginiarneqarnerusariaqarnerat takutinniarneqarluni. 
                                                                                        Nunat peqataasut tassaapput: Kalaallit Nunaat, Island, Sverige, Norge, Finland, Rusland, Alaska, Canada. Kiisalu nakkutilliisutut taallugit Singapore, Tyskland Indialu.

Pinngortitallu illersornissaa innuttaasut tamarmik akisussaaffigigaat, Julie Lynge Ezekiassen oqarpoq: 

- Suliniutit assigiinngitsut tusarsaagaluarput, soorlu immamut plastikki imaluunniit pinngortitamut plastikki eqqaannarneqarnerani soorunami uumassusillit aamma eqqugaasartut taava tassaniinneruvoq ilisimasat oqariartuutillu siammartinneqarnerusinnaasut innuttaasut eqeersimaartinnerulerneqarsinnaasut pinngortitaq uagut akisussaaffigigatsigu.

Arctic Youth Summit oktoberimi Finlandimi Rovaniemiippoq, tassanilu nunap inoqqaavisa inuusuttaat 34-t peqataapput. 
Tassanilu inuusuttut nipaat politikerinit oqartussanillu allanit tusaaniarneqarnerusariaqartoq oqariartuutigineqarpoq. Soorlu assersuutigalugu issittumi inooriaaseq, piorsarsimassuseq, naleqartitat, ileqqutoqqat, aalisarneq, piniarneq silallu allanngoriartornera ilutigalugu unammillernartut ajornartorsiutillu pillugit. 
Arctic Youth Summit, Issittumi Siunnersuisoqatigiinnit Verdensnaturfondemiillu WWF-imit aaqqissuussaavoq. 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl