Pinngortitap pisuussutai pinngoqqissinnaanngillat
IA isumaqarpoq suliffeqarfiit pisuussutinik piiaasut akileraarusersornerisigut Nunarput milliardinik isertitaqarsinnaasoq. Siumulli isumaqarpoq ingerlatseqatigiiffiit qallukkaminnit isertitaasa akitsuusersornerisigut isertitaqarfigineqarsinnaasut.
Eqqaamaneqassaaq aatsitassat pinngoqqissinnaanngillat, suffineq ajorput. Tassa imaappoq nunamiik qallorneqaruni, taava qaqagorsuarmut tammassaaq. Taamaammat upperaara piginnitsut toqqaannarnerusumik pissarsiariaqartut aatsitassat qallorneqalerpata. Upperigakku piginnaatitaaffigigipput, pissusissamisoortutut isigigakku nunarput toqqaannarnerusumik procentinnassasoq. Allatut iliorneq ileqqorlunneruvoq, Jens-Erik Kirkegaard, Siumut tunuliaqutaralugu Inatsisartunut qinigassanngortittoq erseqqissaavoq.
Nunani allani suliffeqarfinnit akileraarummik atuiffiusuni suliffeqarfissuit nunap pisuussutaanik qalluisimasut akiliuteqartinnissaat ajornartorsiutigineqartupilussuusimavoq, nunatsinnilu taamaatut pisoqarsinnaanera Siumukkormiut annilaangassutigaat. Uuliasiutileqatigiiffiit sinneqartooruteqarfiusut akileraaruteqartinnissaat USA-mi ajornartorsiutaasimavoq, aamma Danmarkimi, naallu susassaqarfimmi sukaterisoqarsimagaluartoq aningaasat pissarsiarineqartut amerlisimannginnerat, annilaanganermik pilersitsivoq.
-Periarfissat amerlapput, royalty (akiliut toqqaannartoq), akileraarut appalaarlugu, ingasattumik iluanaarnermi akileraarut il.il. Pissusissamisoortoq tamanut anguneqarsinnaavoq. Kisianni eqqarsartariaqarpugut suliffissaannarniit suliffeqarfiutittalu suliassaqartinnissaannaaniik annertunermik.
Aatsitassaatigummi killeqarput pinngortinneqaqqissinnaanatillu, taamaammat aama siunissaq ungasinnerusoq eqqarsaatigalugu iluaqutigitigit. Tamanut piujuaannartitsineq aallaaviussaaq, Jens-Erik Kirkegaard, Siumut tunuaqutaralugu qinigassanngortittut nutaat ilaat oqarpoq.
