Pinngortitaleriffiup ikiuunnini millionilikkaanik pissarsiaqaatigigaa
Umiarsuup takornariartaatip Ocean Explorerip nusunneqarnera, Pinngortitaleriffiup 4 millionit koruuningajannik pissarsiaqaatigaa.
Ocean Explorerimik nusutsineq 3,8 millionit koruuninik akeqassasoq nalilerneqarpoq. Tarajumut ullormut aningaasartuutai suliallu ulorianassusianik naliliineq naliliinermi aallaaviusut, Pinngortitaleriffik tusagassiorfinnut nalunaarpoq.
SunStone Maritime Group, Pinngortitaleriffiup umiarsuarnut allaffeqarfia Tarajumilu inuttat isumaqatigiissuteqartuupput.
Tarajup ikiuunnerani aningaasartuutit suliallu ulorianassusaa aallaavigalugit isumaqatigiissusiortut, tusagassiorfinnut nalunaarummi allaqqavoq.
Ocean Explorer 206-inik issimasoqarluni Ittoqqortoormiit avannaata kangerluisa ilaanni Alpefjordimi ullut unnuallu pingasungajaat ikkanneqqareerluni nusunneqarpoq.
Tarajoq aappassaaneerluni ikuutsilluni Ocean Explorer nusuppaa.
Umiarsuit allat Ocean Explorerimik nusutsillutik ikiuuttut ikiuunnertik iluanaarutigilluarsinnaagaat, umiarsuit naalagaat aamma Svendborgimi imarsiornermik ilinniarfimmi SIMAC-imi lektori Philip Max Cossen KNR-imut sapaatit akunnerata siuliani oqarpoq. Tassa ikiuuttoq ikiuunnini pillugu 3-4 millionit dollarsit missaannik, koruuninngorlugit 20-28 millionik koruunit missaannik iluanaaruteqarsinnaasoq, taassuma nalilerpaa.
Kalaallit Nunaanni Politiit Ocean Explorer pillugu suliami misissuinertik naammassimmassuk, Ocean Explorer Alpefjordimiit ingerlaqqissinnaanngorpoq. Umiarsuup taassuma itsinera aqqartartunit misissorneqartinnani umiarsualivississanngitsoq, Imarsiornermik Aqutsisoqarfiup inassutigaa.