Imerajuttuunermit kingunerlutsitsisut nakorsaatinik katsorsarneqarsinnaapput. Taamaammat peqqinnissaqarfimmut saaffiginninnissaannik kaammattorneqarput

Pinngitsuuisinnaanngitsut aalakoornartumik inerteqquteqarnermi kingunerluuteqartupilussuusinnaasut

Nunatta innuttaasuisa 5 procentiisa missaanniittut imigassamik aalakoornartortalimmik pinngitsuuisinnaanngillat. Tamatuma saniatigut nalunaarsorneqanngitsut amerlapput.

- Imigassamik aalakoornartortalimmik imersinnaajunnaarnermi kingunerlutsitsinermut atatillugu kingunerlutsitsilluni noqartoqarsinnaanera, imerunnaapiloornermi takorruuisoqarsinnaanera paatsiveerusimalertoqarsinnaaneralu aarlerinarsinnaapput, Birgit Niclasen oqarpoq.

Imerajuttuunermit kingunerluutit ulluni arfineq-marlunni quliniluunniit sivisussuseqarsinnaasut, kingullermillu imernermit akunnerit arlalialunnguit qaangiuttut kingunerlutsitsisoqalersinnaasoq, taanna paasissutissiivoq.

Naalakkersuisut imigassamik aalakoornartortalimmik 2,25 procentinit kimittunerusumik Nuummi, Kapisilinni Qeqertarsuatsiaanilu sapaatit akunnerata naanerani inerteqquteqalersitsigallarput. Meeqqat illersorniarlugit Covid-19-illu tunillaassuutilernissaa pinngitsoortinniarlugu taama aalajangerput.

AAMMA ATUARUK Nuummi, Kapisilinni Qeqertarsuatsiaanilu imigassat matuneqarallartut

Taamatullu aalajangertoqarmat ilaat kingunerlutsitsisinnaassapput.

- Imerajuttut soorunami kingunerlutsitsisuusarput, Birgit Niclasen oqarpoq.

Kingunerluutit sakkukinnerusut tassaasinnaapput kassutsitsineq, niaqorlunneq, nikallunganeq merianngunerlu.

Innuttaasut peqqissusaannik 2018-imi misissuineq naapertorlugu, nunatta innuttaasuisa 5 procentiisa missaanniittut imigassamik aalakoornartortalimmik pinngitsuuisinnaanngillat.

Inuit 150-it missaanniittut Nuummi Allorfimmi ukiumut katsorsarneqartartut, Birgit Niclasenip paasissutissiissutigaa.

Imigassamilli ajornartorsiuteqartut amerlanerujussuunissaat naatsorsuutigineqarpoq.

- Nalunaarutigineqarsimanngitsut amerlasoorujussuupput. Imerajuttut 10 procentiinnaat katsorsartittartut naatsorsuutigineqarpoq, Birgit Niclasen oqarpoq.

AAMMA ATUARUK Unicef: Imigassamik matusigallarneq ajunngilaq - eqqissiviilliortoqarsinnaavorli

Kingunerluutillu ajorneruleriartortarmata imerajuttuunermit kingunerlutsitsisunut kaammattuuteqarpoq.

- Peqqinnissaqarfimmut saaffiginnissapput. Kingunerluutit nakorsaatinik katsorsarneqarsinnaapput. Peqqinnissaqarfimmeersut Kalaallit Nunaanni nakorsaatinik tunniussisinnaasuupput, Birgit Niclasen oqarpoq.

Imigassamilli aalakoornartortalimmik inerteqquteqalersitsineq imigassamik aalakoornartortalimmik pinngitsuuisinnaanngitsunut periarfissiisinnaasoq, taanna isumaqarpoq.

- Imaassinnaavoq arlaannut ajornakusoortorujussuussasoq kingunerlutsitsisoqarsinnaallunilu. Kisianni inuuneq taama atorniarnerlugu eqqarsarnissamut aamma periarfissiivoq. Tamanna pingaaruteqarsoraara. Periarfissarititat atorluakkit. Atorfissaqartikkukku Allorfimmut sianerit. Atorfissaqartikkukku peqqinnissaqarfimmut sianerit. Periarfissat atorluakkit. Tikilluaqqusaasorujussuuvutit, Birgit Niclasen oqarpoq.

AAMMA ATUARUK Tamaat isigalugu: Coronavirus pillugu killiffik

Apeqqutissallit allallu Nuummi Allorfimmut sianersinnaapput, normumut 53 12 42-mut imaluunniit 52 53 43-mut

Nuummi Allorfimmut oqarasuaatitigut ullut tamaasa nalunaaqutaq ullaakkut qulingiluanit ualikkut pingasut tungaannut saaffiginnittoqarsinnaavoq.

Isummersuutit