Pinngitsaaliilluni arnerisarneq pinngitsoortinniarlugu suliniut taamaatinneqarpoq
- Siunnersuut Inatsisartuni eqqartorneqareeraluartoq taamaattoq aningaasanik immikkoortitsisoqarsimanngilaq, tamaattumik maanna ukioqartitsinissatsinnut periarfissaqanngilagut, Martha Lund Olsen oqarpoq.
Demokraatit siulittaasuata, Jens B. Fredriksenip paasisinnaanngilaa, pinngitsaaliilluni arnerisarneq akiorniarlugu 2014-imut ukioritinneqartussaq, Naalakkersuisunit ingerlanneqarniannginnera.
- Paasisinnaanngilara Naalakkersuisup taama akissuteqarnera, tassami qinigaaffimmi kingullermi siunnersuuteqaratta Siumup Atassutillu aamma tapersersorpaat ilaatigut annersaaneq aqqutigalugu arnerisarnerup pinaveersaartineeqarnissaa pillugu qanoq iliuuseqartoqarnissaanik oqarlutik.
Jens B. Fredriksen akissummut ilaatigut taama qisuariaateqarpoq.
Pinngitsaaliilluni arnerisarnerup pinaveersaartinneqarnissaanut aappaagu ukioq ukioritinneqartussatut siunnersuutigineqarsimasoq, tassa aningaasanik aporfeqarpoq.
- Takusinnaavara aningaasanut inatsimmi aningaasanik ukioritinneqartussamut immikkoortitsisoqarsimanngitsoq. Siornali pilersaarutaasimasoq alla Naalakkersuisunit saqqummiuttussaavarput, tassa annersaasarneq pillugu qanoq iliuuseqarnissamut nalunaarusiaq ukiamut saqqummiutissavarput. Siunnersuutigut periusissat sisamat, Inatsisartuni akuerineqarpata, taava taakku aallaavigalugit siunissami iliusissanik pilersaarusiussaagut.
Martha Lund Olsen oqarpoq. Tamanna pillugu Jens B. Fredriksen ima akivoq.
- Martha Lund Olsen akissuteqarpoq uanga apeqqutinnut tunngassuteqanngitsunik. Annersaasarnerup akiorneqarnissaa kisiat oqaatigaa, uangali apeqqutiga tassa arneriniarluni pinngitsaaliisarneq qanoq akiorniarneqarsinnaava? Tamassumalu suliassatut ingerlanneqarniarnera apeqqutigalugu. Tassalu tamanna Inatsairtuni partuiit tamarmik isumaqatigalugu Naalakkersuisunut suliakkiutaat, Jens B. Fredriksen oqarpoq.
Naalakkersuisunilli siunniunneqarpoq iliusissat allat pillugit suliniuteqarnissaq.
- Kiguaassiutitigut atornerlunneqarsimasut katsorsarlugit aallartissavagut aamma atornerluisimasut katsorsarneqartassallutik, isumaqarpugullu taamaaliornissarput pitsaasuusoq, Martha Lund Olsen oqarpoq.
Demokraatit siulittaasuat Jens B. Fredriksen, Naalakkersuisunut ima eqqarsaatissiivoq.
- Arneriniarluni pinngitsaaliisarneq ajornartorsiutitut annertuutut isigisariaqarparput. Arnat Nunatsinni eqqissillutik inuusinnaasariaqarput ernumanatik pinngitsaalineqarnissaminnik.
Demokraatit siulittaasuat, Jens B. Fredriksen taama oqarpoq.