Pinnersaasoqartalernissamut Siumut aningaasaleeqataarusunngilaq
![](/sites/default/files/styles/image_934x467/public/article_images/slette_og_ukaliusaq_630.jpg?itok=l_RaG9VM)
- Aningaassat ilaqutariinnut inunnullu inissaaleqisunut atorneqartariaqaraluarput pinnersaaneq tunulliullugu, Aleqa Hammond KNR-imut oqarpoq.
Sanaartukkat 25 millioner koruunit sinnerlugit akeqaraangata aningaasartuutit procentianik ataatsimik nalilimmik pinnersarneqartalernissaa, Inatsisartuni ilaasortat amerlanerussuteqartut tapersersorpaat.
Assersuutigaalugu, sanaartugaq 25 milliuuni koruuninik naleqarpat, kusassaannermut aningaasat 250.000 koruunit atorneqartalissapput. Nunatsinnili aningaasarliortoqartillugu, Siumumit piffissaassorineqanngilaq.
- Aningaasaqarniarneq ilorraap tungaanut aallarpat pinnersaanermut milliuunerpassuarnik atorumaarpugut, Aleqa Hammond oqarpoq.
Siunnersuut saqqummiunneqarmat, Demokraatit akerliugaluarsinnarlutik maanna siunnersuummut tapersersuilerput. Tapersersuilernerminnut tunngaviutippaat, sanaartukkat 25 millioner koruunit sinnerlugit akeqaraangata aatsaat pisortat sanaartugaasa pinnersaasersorneqartalernissaat uani pineqartoq.
Tamanna pillugu Demokraatit sinnerlugit inatsisartuni ilaasortaq Justus Hansen tunngavilersuilluni oqarpoq, pisortat illuliassaat amerlanngitsut kisimik taama pineqartartussaasut.
- Sanaartorneq annertooq, uani eqqartorneqarpoq. Taamaattumik illuliassat eqqartorneqartut killeqarput, Justus Hansen oqarpoq.
Aleqa Hammond Siumut siulittaasua suli paasisaqarnerorusuppoq.
- Demokraatit uagutsituulli siullermik isumaqaraluarput, tassa pingaarnersiusoqaqqaartariaqaraluartoq uatsituulli isumaqarnikuupput. Kisiat isumartik nikisissimavaat, sunalu tamatumunnga tunngavilersuutigisimaneraat paasisaqarfiginngilarput, Aleqa Hammond oqarpoq.