Piniutaarsertunut katersuiniuussisut
Anorersuullu nassatarisaanik piniartut ilarpassui piniutaarsersimammata maanna katersuiniunneqalerput.
-Ullut siulliit aningaasat katersukkat annikitsut oqaatigisinnaavara, ilami annaasat nalingi 100.000kr pallillugit amerlassuseqarmata, piniartullu annertuumik eqqorneqartut aqqaneq-marluullutik, ilaalli annikinnerusumik aamma eqqorneqarput, Rasmine J Normann katersuiniartunut attaveqaataasoq KNR-imut oqarpoq
Tappiffigineqarnerorusuttoq
Rasmine isumaqarpoq kalaallit kalaaleqatiminnut ikiuukkusussuseqarnertik tappiffiginerusariaqaraat.
-Nunarsuarmioqatigut pinngortitap nukissuinik eqqorneqartut kalaaliusugut aningaasarpassuarnik katersuiniuuttarpagut, uagulli eqqorneqarnerput tappiffiginerusariaqaraluarpaat, nunatsinnimi pisuuvoq. Tamannalu uatsinnut katersuiniuussisunut ilungersunarpoq. Rasmine oqaluttuarpoq.
-Silap taama innerani aninissaq ulorianarsimmat, piniartut sakkutik piniutitillu silamiittut aaqqinnissaannut tigunissaanullu piareeqqasimanngillat. Ilami suna tamaat anorersuup teqqarpaa aninissarlu ulorianarsilluni, Rasmine KNR-imut oqarpoq.
Aningaasanik pissarsineq
KNI aningaasanik 20.000 koruuninik tapiisimavoq, taakkulu saniatigut inuinnaat arlaqartut tapiiniarlutik saaffiginnissimapput, Qaanaamilu nunaqqatigiit katersuiniarlutik igaanik tuniniaassapput bankorlutillu.
Komité aallartinneqartoq matumunnga pisumuunnaanngitsoq katersuiniutitut aallartinneqarpoq, ukiummi tamarluinnangajaasa Qaanaami ajornartorsiut tamanna nalaanneqartaannarmat nunaqqataasut ikiuerusullutik katersuiniuussineq aallartippaat.
-Ingerlaavartumik ikiuigasuarsinnaanissamut aningaasanik katersuiniarnerput aallartippoq, nunaqqatigut eqqugaasut isiginnaaginnarsinnaannginnatsigit, taakkumi nerisitarimmatigut, Rasmine oqarpoq.
NUTARTIGAQ: Ualeq qiteraannartoq naatsorsuinerup kingulliup takutippaa 211.586 koruunit missaaniittut annaasaqaataasut.