Piniartut savaatillillu nannuttassiineroqqusipput. Politikerimmita qanoq isumaqarpat?

Inequnartoq, alutornartoq takorannertorlu. Tassa oqaatsit taakkorpiaat nannut piffissami kingullermi oqallisaaneranni tusarsaaqqaakkajunngillat.

Sualummik Kujataani savaatillit Tunumilu piniartut inuisalu oqallinneranni.

Nannunimmi nunatsinni illoqarfinnut nunaqarfinnullu ukioq manna pisarnerminngarnit qanillattortoqakulaneroqinera erloqissutaallunilu sioorassutaavoq.

Nannunik pisarnerminngarnit qanillattortoqakulaneroqinera Kujataa aasaq pisarnerminngarnit sikorsuaqarneroqineranik pissuteqartoq arleriarluni oqaatigineqarpoq.

Nannuttassiineruneq nannut qanillattortut ajornartorsiutaajunnaarnissaannut aaqqissutissatuaasoq arlalinnit suaartaatigineqarpoq, kisianni pinngortitaq pillugu nunarsuaq tamakkerlugu suliniaqatigiiffik WWF Verdensnaturfonden nannut qanillattortut ajornartorsiutaajunnaarnissaannut allattut aaqqiissoqartariaqarsorinnittunut ilaavoq.

Tassa soorlu sumiiffiit ilaanni nakkutilliinikkut silassorissuusiamillu atuinikkut.

- Nannunik ilisarsisarsinnaasarput soorlu nannunik nakkutilliisunut sms-inik nassitsisarsinnaallutik, taamaaliornikkullu nannut qimaatinneqarlutik, nunatsinni WWF-ip pisortaa Malene Lynge oqarpoq.

Nannut oqallisigineqarnerulerisa ilutigisaanik politikerertatsinni nannuttassiissutissanik amerlassusiliisartu ilaat tamanna qanoq isumaqarfigineraat paasiniarlugu oqaloqatigaavut.

Tassa IA-meersoq, Siumumeersoq Naleqqameersorlu oqaloqatigaavut.

Toqunneqarsinnaasariaqartut

Nannunik ukioq manna pisarnerminngarnit qanillattortoqakulaneroqinera aaqqiivigineqalertortariaqarlunilu nannut kisinneqartariaqartut, Inatsisartuni ilaasortaq Inuit Ataqatigiinneersoq Inatsisartut Aalisarnermut, Piniarnermut Nunalerinermullu Ataatsimiititaliaanni aamma siulittaasuusoq Kristian Jeremiassen isumaqarpoq:

- Kisitsinissamik pisassiissutit amerlaneqarnissaanik aningaasanillu immikkoortitsinissaq naalakkersuinikkut tamanna aamma isummerfigisariaqarparput, taanna oqarpoq.

- Kisianni kisitsinissaq utaqqissanngilarput. Tassa nanoq takkuppat inoqarfimmut ingerlaannaq toqunneqarsinnaasariaqarpoq. Apeqqusersorneqarnani, taanna aamma oqarpoq.

Inatsisartut Aalisarnermut, Piniarnermut Nunalerinermullu Ataatsimiititaliaata siulittaasuata tullia isumaqataavoq.

- Isummersortarninni nannut illersugaanerat sakkortuallaarpoq, Naleqqameersoq Jens Napãtôk oqarpoq.

- Tamanna nannut amerlivallaarujussuarlutik illoqarfinnut nujuissigaluttuinnarlutik qanillattortarnerannik kinguneqarpoq.

Nannut illoqarfimmut nunaqarfimmulluunniit qanillattortut qimaasaaqqaanngikkaluarlugit toqunneqalertorsinnaasariaqartut nannuttassiisoqanerusariaqartorlu, Jens Napãtôk aamma isumaqarpoq.

- Avannaani apriilinnguinnartoq marsinnguinnartorluunniit nunguttarput. Tunumi aamma pisassat taamaapput. Kujataani pisassamininnguit aamma aasanngitsorluunniit nungunneqartarnerat takutiinnarpaa tassani ilasariaqartut, taanna oqarpoq.

Siumumeersup Lars Poulsenip Inatsisartuni ilaasortaaqatini isumaqatigai, nannummi qanillattortut qimaasaaqqaanngikkaluarlugit toqunneqalertorsinnaasariaqartut taanna aamma isumaqarpoq. 

Tamatuma saniatigut piniartut nannuttassiineroqqusisuusut tusaaniarneqarnissaasa pingaartorujussuusoq, taanna aamma isumaqarpoq.

- Nunat tamalaat isumaqatigiissutaat tamakkua tunngavilersuutiginiarneqartaraluartut (nannuttassanik amerlassusiliiniarnermi, aaqq.)), kisianni isumaqarpunga nanoqassuseq pitsaasumik inissisimasoq aammalumi killilersugaalerneraninngaanniit maannamut amerlarujussuarsimanissaat piniartortatta oqariartuutigisartagaat tusaaniartariaqarpagut, taanna oqarpoq.

- Nanoqatigiit ilisimatuussutsikkut paasineqarnerata kingorna amerlassusilerneqarnikuunngillat, taamaattumillu nannut amerlaneqarnissaanik tunngatillugu pissutissaqarpugut, pingaartumik kujataani tunumilu.

Inatsisartulli nannuttassiisarneq nannullu qanillattortut qanoq iliuuseqarfigineqarnissaat itinerusumik oqallisigisariaqaraat, Siumumeersoq Lars Poulsen aamma isumaqarpoq.

- Piniartortagut, immikkut ilisimasallit minnerunngitsumik peqatigiiffiit kattuffiillu ilisimasaat taavalu suliniaqatigiiffiit WWF-itut ittut soqutigisallit akimorlutik oqaluuttariaqarput, minnerunngitsumilli piniartortatta ullormiit ullormut malinnaavigisaat taakkua assorujorussuaq tusaaniarneqarnissaat isumaqarpunga pingaartorujussuusoq, Lars Poulsen oqarpoq.

Aalisarnermut piniarnermullu naalakkersuisoq Kim Kielsen nannut nannutassiissutillu qanoq isumaqarfiginerai paasiniarlugu oqaloqatiginiaraluarparput.

Taannali pisinnaanngitsoq, Aalisarnermut Piniarnermullu Naalakkersuisoqarfik ilisimatitsivoq.