Nuummi inuppassuit Inatsisartut allaffiata silataannut novembarimi akerliussutsimik takutitsiartortorpassuupput. Toqqorsivimmit assiAssi: Ane-Marie Petersen, KNR

Pingajussaanik misiliilersut: Inatsisartut saanni arfininngorpat akerliussutsimik takutitsisoqassasoq

Paninnguaq Louisa Rosingip nunatsinni politikerinut pingajussaanik akerliussutimik takutitsinissaq aaqqissuunniarsaraa.

Inuppassuit Inatsisartut allaffiata saanni siorna novembarimi marloriarlutik katersuupput. Katersuunnermi allaffissuup saani majuartarfinnut sioraasanik kuisisoqarpoq, allagartarsuarnik tigummiartoqarpoq suaartaattoqarlunilu: “Naammaleqaaq”.

Akerliussutsimilli takutitsisut unipput. Inatsisartullu ukiakkut ataatsimiinnerat naammassilluni. Sulili ilorrimaarinnittoqanngilaq. Taamaammat Paninnguaq Louisa Rosingip akerliussutsimik pingajussaanik takutitsisoqarnissaa aaqqissuuppaa. Tamannalu Inatsisartut allaffiata silataani aqagu arfininngornermi ullup-qeqqanut pissaaq.

- Naalakkersuisut siulittaasuanit, Kim Kielsenimit tusaaneqarnissarput neriuutigaarput, Paninnguaq Rosing oqarpoq.

AAMMA ATUARUK Akitsuutit nutaat pillugit akerliussutsimik takutitsisut: Naammaleqaaq!

Tamannali ajornakusuulaassaaq. Kim Kielsenimi nunatsinni uuliamik gassimillu nittarsaassiartorluni Texasimi Houstonimiippoq. Inatsisartullu maanna ataatsimiinnatik.

Poltikerinimmi maanna tusaaneqarsinnaanavianngilasi?

- Takkukkutta takkutissapput, Paninnguaq Louisa Rosing isumaqarpoq.

- Inatsisartuni sapaatip-akunnerata naanerani aamma sulisoqartarpoq.

Akitsuutit nutaat ullormiit ullormut atuutilersut

Nunatsinni politikerinut akerliuneq aningaasanut inatsisip novembarimi siorna akuerineqarneratigut annertunerulerpoq. Akitsuutinut 13-it (Siumut, Nunatta Qitornai Demokraatillu) akuersipput qulillu (illuatungiliuttut) akerliullutik.

  • Cigarettit 20-t 4 koruunit 40 øremillu akisunerulissapput.
  • Sukkut puussiaq kilomut 4 koruunit 31 øremik akisunerulissaaq.
  • Sukkulaatit, mamakujuit kiilumut 5 koruunimik akitsuuserneqassapput.
  • Imigassaq aamma akisunerulissaaq. Imigassallu puiaasaani literimut qanoq annertutiginersoq apeqqutaalluni akitsorneqassalluni. Immiaaraq 33 centiliteriusoq 66 øremik akisunerulissaaq.
  • Tusarfik: Brugseni

Akerliussutsimik takutitsisut sioraasanut, mamakujunnut imigassamullu akitsuutit ilaatigut kamaatigaat. Akisunerulersitsisoqarneratigummi ilaqutariit pissaatikinnerusut eqqugaanerpaasut, akerliussutsimik takutitsisut isumaqarput.

Akitsuutilli politikerinut akerliusunut aallarniutaanerpaagunarput. Akerliussutsimik takutitsisut naalakkersuisut meeqqanik atugarissaarnissamillu salliutinnatik mittarfinnik ingerlatsiviillu akileraaruserneqartarneranik salliutitsinerat aamma erseqqissaatigineqarpoq.

- Soraarnerussutisiallit, nunatsinni peroriartornikut nunanut allanut Danmarkimullu allat nuuttalerput, Paninnguaq Louisa Rosing oqarpoq.

- Kusanaappoq.

AAMMA ATUARUK Kim Kielsenip akerliusut itigartikkai: Qinersereerpusi - uagut pingaarnersiuivugut

Akerliussutsimik takutitsisut piumasaqaataat Kim Kielsenip itigartitsissutigaa.

- Inuit ataasiakkaat nammineerlutik aalajangissavaat pujortassanerlutik, immiaarartussanerlutik imaluunniit sioraasanik pussuianilluunniit pisissanerlutik. Namminneq toqqagassaraat, Kim Kielsen KNR-imut oqarpoq.

- Eqqaamaneqassoorli, innuttaasut qinersereerput. Tamat oqartussaaqataanerannik qinersinikuupput, taakkualu amerlanerussuteqarnikkut Inatsisartut aalajangerpaat Naalakkersuisut qanoq ingerlassanersut.

Tunniutiinnanngitsoq

Paninnguaq Louisa Rosingili tamanna pillugu tunniutiinnanngilaq

- Tamanna allanngortikkusuppara. Maannakkut tusarneqassaagut. Nunatsinni aqutsisut uagutsinniit tigusillutik mittarfinnut tunniussipput. Qanorli namminneq tigusiffigineqarlutik misigigaluarunikku?

AAMMA ATUARUK Ekspert om demonstrationer: Kim Kielsen behøver ikke at være bange

- Kingullermitulli takkuttoqartiginissaa naatsorsuutigaara. Akerliussutsimik takutitsissaagut tamatumuunalu tusarneqarnissarput neriuutigaarput. Naammagittaannarsinnaanngilagut. Naammaleqaaq!

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat