Kim Kielsenip akerliusut itigartikkai: Qinersereerpusi - uagut pingaarnersiuivugut
Innuttaasut Naalakkersuisut, aningaasanut inatsit nutaaq aamma mamakujuttunut, sukkunut tupanullu akitsuutinik qaffaaneq pillugit akerliussutsimik pingasunngormat takutitseqqipput.
Nuummi innuttaasut Naammaleqaaq - Nok er nok-imik taallugu Inatsisartut ataatsimiittarfiata silaataani akerliussutsimik takutitseqqipput.
AAMMA ATUARUK Akerliussutsimik takutitsisut Kim Kielsen oqalugiarnerani tunukkaat
Naalakkersuisulli siulittaasuat, Kim Kielsen, isornartorsiorneqarnertik pillugu pingasunngormat unnukkut Qanoruumi apersorneqarnermini eqqissisimavoq. Innuttaasut tamat oqartussaaqaataaneranni periarfissanik akerliussutsimik takutitsillutik atuinerat ataqqivaa, kisianni:
- Eqqaamaneqassoorli, innuttaasut qinersereerput. Tamat oqartussaaqataanerannik qinersinikuupput, taakkualu amerlanerussuteqarnikkut Inatsisartut aalajangerpaat Naalakkersuisut qanoq ingerlassanersut. Taamaasillunilu Naalakkersuisoqatigiinnik pilersitsisoqarpoq.
Innuttaasut sukkunik tupanillu atuinissartik namminneq toqqassavaat
Innuttaasut Naalakkersuisut kukkusumik tulleriiaarisimanerarlugillu meeqqanik innuttaasunillu pissakinnerusunik tunulliussinerarpaat. Mamakujuttunut, sukkunut tupanullu akitsuutinik qaffaaneq innuttaasut naammagittarunnaarnerannik kinguneqarpoq. Akerliusummi isumaqarput ilaqutariit pissakilliortut eqqugaanerpaasut.
AAMMA ATUARUK Ilisimasalik akerliusut pillugit: Kim Kielsen ernumassutissaqanngilaq
Kim Kielsenilli naammagittaalliortut tusaasimanerarpaat, tamannali akitsuutinik allannguinermik malitseqarnavianngitsoq oqaatigaa.
- Inuit ataasiakkaat nammineerlutik aalajangissavaat pujortassanerlutik, immiaarartussanerlutik imaluunniit sioraasanik pussuianilluunniit pisissanerlutik. Namminneq toqqagassaraat.
Kielsen: Peqqinnerulertariaqarpugut
Europamiut nappaataat inooriaatsimik pissuteqartut pualavallaarnerlu nunatsinni atugaalernissaat ingalassimatinniarlugit akitsituutinik qaffaallutik taanna oqarpoq. Tamakkuami peqqinnissaqarfitsinnut suliasaqarnerulersitsisapput aningaasartuutaanerulerlutillu, Kim Kielsen nassuiaanermini oqarpoq.
- Akileraarut qaffassimasinnaagaluarparput allatigulluunniit qaffaasimasinnaagaluarluta. Uagulli inuulluataarutinut soorlu sikaritsinut, imigassamut sukkunullu akitsuutinik qaffaanissarput toqqarparput. Peqqinnerulertariaqarpoq, taanna oqarpoq.
Aningaasanut inatsisip imarisaata pitsaaqutaanik ersarissaaqqinnissartik pisariaqariaqarsoraa. Tamannalu tusagassiortunik tallimanngorpat katersuutsitsineranni pissaaq.
Kim Kielsenip Qanoruumi apersorneqarnera tamaat uani isiginnaarsinnaavat:
