Pinerluttut inuiaqatigiinnik kiffartuussinerusariaqarput
Taama siunnersuuteqarnerminut tunngavilersuutigaa, siunertarineqassammat eqqartuussisut inuiaqatigiinni kiffartuussinermik, siusinnerusumut sanilliullugu amerlanerusunik pineqaatissiisalernissaasa periarfissinneqarnissaa.
- Isumaqarpunga una siunnersuut pinerluttut isertitsivinnut utikaajaarunnaarnissaannut iluaqutaassasoq, Siumut sinnerlugu inatsisartuni ilaasortaq Doris Jakobsen oqarpoq.
Doris Jakobsenip taama siunersuuteqarnerminut tunngavilersuutaasa ilagaat, Qallunaat Nunaanni, inuiaqatigiinni kiffartuussinermik pineqaatissiinermi pinerluttartut parnaarussivinnut utikaajaarunnaamisimanerat paasineqarsimammat.
Nunatsinni pinerluttut ilaasa inuiaqatigiinni kiffartuussisarnissaat 2010-mi januaarip aallaqqaataani atuutilerpoq. Ullorlu manna tikillugu pinerlussimasut 20-nik amerlanerugaanngitsut inuiaqatigiinni kiffartuussinissaminnut pineqaatissinneqarsimapput.
Taama ikitsigisut taama pineqaatissinneqarsimaneri, Kalaallit Nunaanni pinerluttulerinermut ilisimasallip, Namminersorlutillu Oqartussanut Danmarkimilu inatsisinik atortitsinermut ministeriaqarfimmut siunnersortaasartoq, Leif Senholt KNR-imut januaarimi oqarpoq, pineqaatissinneqarsimasut inissiisarfinnullu utaqqisut inuiaqatigiinnut akisuupilussuusut.
Soorliuna inuiaqatigiinni kiffartuussinissamik pineqaatissiineq 300 timenut sivitsorneqassasoq, uffa ulloq manna tikillugu 20-iinnaat kisimik taama pineqaatissinneqarsimasut, Doris Jakobsen aperaarput, taannalu ima akivoq.
- Soorunami eqqartuussiviit namminneerlutik aalajangigassaraat kikkut qanorlu pineqaatissinneqartassasut, uangulli politikerit sinaakkutissanik innersuussiinnarsinnaavugut, Doris Jakobsen oqarpoq.
Doris Jakobsenip aamma oqaatigaa, inuiaqatigiinni kiffartuussinissamik pineqaatissiisoqannginnerani pinerluttut inuttut atugarisaannik misissuiffigineqartassasut.
- Isumaqarpunga pingaaruteqarluinnartoq, annikitsumik pinerluuteqarsimasut tamaavimmik inuttut atugarisaat misissoqqaarneqartarnissaat aammalu naliliiffigineqartassasut inuiaqatigiinni kiffartuussinissamut piukkunnarnersut, Inatsisartunut ilaasortaq Doris Jakobsen oqarpoq.
Inuiaqatigiinni kiffartuussisarnerup sivitsorneqarnissaanut Inatsisartuni partiit tamarluinnarmik isumaqataagaluarlutik, taamaattoq isumaqarput apeqqut tamanna Inatsisinik Atortitsinermut Ataatsimiititaliap suliareqqaassagaa.
