Pinerlunnermik eqqugaasut ilisimannittullu ikiorserneqartalernissaat ilimanarsivoq

Pinerlineqarsimasut pinerlunnernilu ilisimannittut ikiorneqarnerunissaat Naalakkersuisut folketingimilu ilaasortat tamarmik isumaqatigiissutigaat.

Taamaammat pinerlunnermik eqqugaasunut nunatsinni siunnersuisarfeqalernissaa aalajangiuppaat.

Taamalu aalajangerneq IA-p folketingimi ilaasortaatitaata Aaja Chemnitzip nuannaarutigaa.

- Ataatsimut isigalugu nakuuserneq annertusiartorpoq, taamaammallu pinerliisut kisiisa sinnerlugit suliat isiginiarneqassanngillat. Eqqugaasulli sinnerlugit aamma suliniutit qulakkeerneqartariaqarput, eqqugaasut pillugit suliniutit amerlanerusariaqarput soorlu nakuusernermik eqqugaasut pillugit suliniutit.

Pilersaarusioqqaartariaqarpoq

Pinerlunnermik eqqugaasut qaqugu siunnersorneqarsinnaalissanersut qanorlu siunnersorneqartassanersut suli ilisimaneqanngilaq.

Nunatsinni pinerlunnermik eqqugaasunut siunnersuisarfiup sukkanerpaamik ammarnissaanut pilersaarutip piareernissaa, Justitsministeriap Københavnimiittup aasaq manna folketingimi ukiup ataatsimiiffiusup naannginnerani siullertut suliassaraa.

- Ukiorpassuit ingerlareermata pilersaarutip piariipallannissaa kisimi pingaaruteqanngilaq, piviusunngortitsinissaq eqqugaasunullu siunnersuisoqalernissap qulakkeernissaa taamatulli pingaartigaaq, taanna oqarpoq. 

Pinerlunnermik eqqugaasunut siunnersuisarfik Danmarkimi 2001-mi pilersinneqarpoq. Siunnersuisartut kajumissutsiminnik sulisut pinerlunnermik eqqugaasimasunik amerlanertigut oqarasuaatikkut oqaloqatiginnittarput.

Ornigulluni siunnersuisartumik oqaloqateqarneq imaluunniit onlinemik oqaloqateqarneq aamma periarfissaapput, periutsillu taakku Aaja Chemnitzip nunatsinni atorluarneqarsinnaasutut nalilerpai.

Iluatsissappalli suinnersuisartutut kajumissutsiminnik sulerusuttunik ikiuerusuttoqartariaqarpoq. Siunnersuisartussat tassaasinnaapput pinerlunnermik eqqugaasimasut aqqusaakkaminnik qaangeereersut.

- Kikkulluunniit pinerlunnermik eqqugaasimasut misilittakkatik atorlugit ikiuinissaminnut nukissallit attavigineqarnissaat tulluartuusoraara.

- Taakku ima oqarsinnaagunik: 'Allat uattulli misigeqqunagit ikiorusuppakka', taava maanna ikiuinissaminnut periarfissaqarput.

Pinerlunnermik eqqugaasunut siunnersuisarfik Danmarkimiittoq inunnik 200-t missaanniittunik kajumissutsiminnik maanna sulisoqarpoq.

Aningaasaateqarfik imaaliallaannaq periarfissaanngitsoq

Pinerlunnermik eqqugaasunut siunnersuisarfiup nunatsinni pilersinneqarnissaanut sulineq sivisusimaqaaq.

Pinerlunnermik eqqugaasunut ilimannittunullu Danmarkimi siunnersuisarfeqalernissaa Folketingip ukiut 25-t matuma siorna aalajangiuppaa. Danmarkimilu pinerlunnermik eqqugaasunut siunnersuisarfik pillugu inatsit 1997-mi atuutilerpoq 2001-milu siunnersuisarfik ammarneqarluni.

Politeeqarfiit Danmarkimi nunap immikkoortuaniittut tamarmik maanna aqqaneq marluusut pinerlunnermik eqqugaasunut siunnersuisarfeqarput.

Pinerlunnermik eqqugaasunut nunatsinni siunnersuisarfeqalernissaanut periarfissanik misissueqqusillutik Naalakkersuisut 2019-mili Justitsministeriamut saaffiginnittarput. Maannalu aatsaat akuersissutigineqarpoq.

Nunatsinni eqqartuussiveqarfiup Danmarkimi eqqartuussiveqarfimmi atukkat assigalugit aaqqinneqarnissaanik piumasaqarlutik, Naalakkersuisut 2023-mi danskit naalakkersuisuinut allagaqarlutik appisaluussipput. Piumasaqarnerat danskit naalakkersuisoqatigiivini siunertaareerpoq.

Pisulli ersersippaat eqqartuussiveqarfimmi atukkat assigiilissappata naalakkersuisut kimigiiseqqittariaqartut. Assersuutitut taaneqarsinnaasoq tassaavoq Danmarkimi 2014-miilli eqqugaasimasunut aningaasaateqarfeqarnera. Pineqaatissinneqartut tamarmik, akiliisussanngorlugit imaluunniit parnaarunneqartussanngorlugit eqqartuunneqartut tamarmik eqqartuussinerit tamaasa 500 koruuninik aningaasaateqarfimmut tassunga akiliisinneqartarput.

Aningaasat pinerlunnermik eqqugaasunut siunnersuinermut, ilisimatusarnermut paasissutissiinermut aamma pinerlunnermik eqqugaasunut ilisimannittunullu ikiuinermik suliniutinut atorneqartarput.

Nunatsinnili pinerlunnermik eqqugaasunut suliniut pillugu apeqqutinut akissummi Justitsministeria ima akivoq:

- Pinerlunnermik eqqugaasunut anigaasateqarfimmik Kalaallit Nunaanni pilersitsisoqarnissaa Naalakkersuisut pingaarnerutillugu kissaatigissappassuk Justitsministeriap suliaq taanna maanna pingaarnertut ingerlatilissavaa.