Naalakkersuisut Danmarkimi inatsiseqarnermut ministereqarfik allakkatigut avoqqaaraat
Danmarkimi eqqartuussiveqarnermut tunngasuni allannguillattaartoqartillugu nunatsinni eqqartuussiveqarnermut tunngasuni immikkoortunik equngasortalinnik aaqqiinissamik kinguartitseqattaarneq pitsaanngilaq.
Naalakkersuisut taama isumaqarput. Taamaammat Danmarkimi inatsiseqarnermut ministereqarfik allakkatigut avoqqaaraat.
Nunatsinni eqqartuussiveqarnermut tunngasuni immikkoortut ilai suli equngasortaqartut, Naalakkersuisut allakkaminni erseqqissaatigaat. Tassa nunarput taakkunani ukiuni kingullerni ataasiaannarnani aaqqeeqqusisaraluartoq suli aaqqinneqanngillat.
Taakku ilaat pillaanermut inatsimmi paragraf 147 naapertorlugu sakkortuumik pinerluuteqarsimasunut pillaatissaatitaasutut killiliussap maanna ukiut quliusuusuniit ukiunut 16-inut sivitsorneqarnissaanik kissaateqarnermut tunngasuuvoq.
Nunarput 2019-imili taamaalioqqusivoq. Inatsilli taanna suli allanngunngilaq. Danmarkimimi naalakkersuisut oqarnerat naapertorlugu nunatsinni pineqaatissinneqarsimasunut inissiisarfiit inissaalatsinerat peqqutaalluni sivitsorneqarsinnaanngilaq: Tassa sivisunerusumik pineqaatissiisalernissamut pineqaatissinneqarsimasunut inissiisarfinni massakkorpiaq inissaqanngilaq.
Tamannali akuersaarneqarsinnaanngitsoq, Naalakkersuisut isumaqarput. Danmarkimimi parnaarussivinni inissaalatsineq eqqartuussiveqarnermut politikkimik killiliisuussanngitsoq, Danmarkimi naalakkersuisut nalunaarutigereernikuuaat.
Kalaallit Nunaata tamanna pillugu maalaaruteqarneranut tunngatillugu misissuisussaalatsinertik suli aaqqinneqannginnerannut peqqutaasoq, Danmarkimi inatsiseqarnermut ministereqarfik nalunaarpoq. Tamannali utoqqatsissutigisinnaanngikkaat, Naalakkersuisut isumaqarput.
- Ministereqarfiup sulisussaalatsinini inatsisinik pingaarutilinnik pisarialinnillu allannguinissamik kinguartitseqattaarnermut peqqusiussinera akuersaarsinnaanngilarput, Naalakkersuisut allapput.
Naalakkersuisut Danmarkimi inatsiseqarnermut ministereqarfik inatsiseqarnermut eqqartuusssiveqarnermullu tunngasuni allanik aqqanilinnik Folketingip akuerisariaqagaanik allakkaminni aamma kissaateqarfigaat.
Kissaataat taakku ilaatigut malersuiniarnernik meeqqanullu nittartakkatigut naapertuilluanngitsuliorniarnernik akiuiniarnernut, naapertuilluanngitsuliorfigineqarsimasunillu siunnersuisarfimmik pilersitsiniarnermut Kalaallit Nunaannilu politiit nittartagaata kalaallisoortaqalernissaanut tunngasuupput.