Pinerluffigineqarsimasunut kiisami Siunnersuisarfeqalertoq

Naalakkersuisut nunatsinni pinerluffigineqarsimasunut siunnersuisarfeqalernissaanik Inatsiseqarnermut ministereqarfimmut 2019-imili periarfissarsioqqusipput. Tamanna pingasunngorpat piviusunngussaaq.
Inatsisit Atuutsinneqarnerannut Naalakkersuisoq Mariane Paviasen Jensen (IA) pinerluffigineqarsimasunut siunnersuisarfittaap ammaanersiorneqarnerani Nuummi Kommunip allaffiani qileersissaaq.
Allattoq Emil Weis
aggustip 26-at 2026 08:03

Nunatsinni innuttaasut pinerluttoqarnerani ajutoortoqarneraniluunniit pinerluffigineqarsimasut, takunnissimasut, qanigisaasulluunniit siunnersuisarfimmut pingasunngorpaminngaanniit sianersinnaalissapput.  

Kalaallit Nunaanni Politiit tusagassiuutinut nalunaarummi allapput.  

- Kalaallit Nunaanni Pinerluffigineqarsimasunut Siunnersuisarfiup pilersinneqarnera nuannaarutigaara, Kommuneqarfik Sermersuumi borgmesteri Avaaraq S. Olsen (IA) tusagassiuutinut nalunaarummi oqarpoq: 

- Tamanna inuit artornartunik misigisaqarsimasut pingaarutilimmik ikiorserneqarsinnaanerannik neqeroorutaavoq, Kommuneqarfik Sermersoorlu suliniummut soorunami tapersiivoq. Artornartumik inissisimanermi kinaluunniit kisimiissanngilaq. 

Neqeroorut nuna tamakkerlugu atuuppoq, aallaqqaammullu pingasunngornikkut nal. unnukkut arfineq marlunniit unnukkut qulingiluat tungaannut ammasassaaq. Takunnissimagaanni, qanigisaasuugaanni imaluunniit pinerluffigineqarsimagaanni ajutoorsimagaanniluunniit uunga normumut sianertoqarsinnaavoq: 80 11 30. 

Pinerluffigineqarsimasunut Siunnersuisarfiup Nuummi pingasunngorpat ammaanersiorneqarnerani, Avaaraq S. Olsen aamma meeqqanut, inuusuttunut, inatsisit atuutsinneqarnerannut naligiissitaanermullu naalakkersuisoq Mariane Paviasen Jensen (IA) pinerluffigineqarsimasunut siunnersuisarfittaap ammaanersiorneqarnerani Nuummi Kommunimi allaffeqarfissaani qilersissapput.  

Tamanna nunatsinni sivisuumik utaqqineqarmat nalliuttorsiutigineqassaaq.  

Utaqqineqangaatsiartoq

Danmarkimi pinerluffigineqarsimasutut siunnersorneqarneq politiit immikkoortortaqarfiini 12-ini ukiorpassuarni periarfissaavoq.

Pinerluffigineqarsimasut siunnersorneqarnissaannik inatsit Danmarkimi 1997-imi atuutilerpoq 2001-imilu aallartilluni. Nunatsinni politiit akisussaaffigineqarnerat suli tiguneqanngikkaluartoq tamanna periarfissaasimanngilaq. 

Naalakkersuisut nunatsinni pinerluffigineqarsimasunut siunnersuisarfeqalernissaanik Inatsiseqarnermut ministereqarfimmut 2019-imili periarfissarsioqqusipput. Naalakkersuisut suli iliuuseqartoqanngimmat 2023-mi allakkatigut isornartorsiuingaatsiarput. 

Nunatsinni pinerluffigineqarsimasunut siunnersuisarfeqalernissaa Naalakkersuisut folketingillu 2024-mi isumaqatigiissutigaat.

Taamani Folketingimut naalakkersuisup, Aaja Chemnitzip (IA) pinerluffigineqarsimasunut ukioq taanna siunnersuisarfeqalernissaa naatsorsuutigigaluarpaa:

- Ukiorpassuit ingerlareermata pilersaarutip piariipallannissaa kisimi pingaaruteqanngilaq, piviusunngortitsinissaq eqqugaasunullu siunnersuisoqalernissap qulakkeernissaa taamatulli pingaartigaaq, taanna KNR-imut taamani oqarpoq.

Inatsisit atuutsinneqarnerannut naalakkersuisup nunatsinni aamma neqerooruteqartoqalernera taamaammat aamma naammagisimaarluinnarpaa:

- Ukiuni arlaqaqisuni suliap anguniarneqarnerani killiffik nuannaarutigaara isumalluarfigalugulu, Mariane Paviasen Jensen tusagassiuutinut nalunaarummi oqarpoq:

- Pisariaqartinneqarluarnerami pinerluttuliorfigineqartunut nalunaranilu inuiaat akorninni iluaqusiissasoq nalunanngilaq, qanortorlu atorluarneqarili. Neriuutigaarali siunissami periarfissiissut ataavartunngortinneqarsinnaassasoq.

Kajumissutsiminnik suliaqartunik tunngaveqartoq

Pinerluffigineqarsimasunut Siunnersuisarfik kajumissutsiminnik suliaqartunik pinerluffigineqarsimasunut oqarasuaatikkut tapersersuinissamut ilinniaqarsimasunik ingerlanneqassaaq.

Nuummi borgmesteriusimasoq, Asii Chemnitz (IA) kajumissutsiminnik suliaqartut oqarasuaatikkut oqaloqatigineqarsinnaasut ilagigaat, tusagassiuutinut nalunaarummi allassimavoq.

- Pinerluffigineqarsimasunut Siunnersuisarfik Kalaallit Nunaanni Politiinit aaqqissuunneqarlunilu tapersiiffigineqarpoq, kisianni kajumissutsiminnik sulisut neqerooruteqarnermik ingerlatsisuussapput, Kalaallit Nunaanni Politiini politiinspektørip tullersortaa, Katrine Sandgreen oqarpoq:

- Pinerluffigineqarsimasunut Siunnersuisarfik kajumissutsiminnik suliaqartunik, piffissaminnik, misilittakkaminnik allanullu siunnersuerusussuseqartunik tunngaveqarpoq - tamannalu pingaaruteqarluinnarpoq.

Kalaallit Nunaanni Politiit ammasarfiit sivisunerulersinneqarnissaat namminerlu kajumissutsiminnik siunnersuisunik allaqateqarfiusinnaasoqarnissaa pilersaarutigigitsik aamma oqaatigaat.

Neqeroorut pillugu annerusumik paasisaqarusuttunut nittartakkamik ikiuiffik.gl-imik taaguuteqartumik pilersitsisoqarpoq.