Politikki Ilinniarneq

Pinerliisimannginnermik uppernarsaammik piumasaqarsinnaaneq annertusineqarpoq

Meeqqanut 15-nit inorlugit ukiulinnut sullissisuugaanni, meeqqanik pinerliisimannginnissamut uppernarsaammik tunniussinissamut pisussaatitaanermut inatsisit junimi inatsisartuniit sukateriffigineqarluni allanngortinneqarpoq. Tamanna isumaqarpoq kommunit meeqqanik pinerlissimannginnermut uppernarsaatinik piumasaqaateqartalernissaat annertusineqartoq.

Allattoq Paarnaq Hansen, Nauja Møller

aggustip 17-at 2015 11:20

Angut arlaleriarluni niviarsiaqqanik atornerluisarsimasoq nutaarsiassaqarfinni ukiup uuma aallartinnerani sammineqaqaaq. Tamanna pisimavoq kommuninit inuusuttuaqqallu ornittagaanniit uppernarsaammik piumasaqarsimannginnerat takusaqarsimannginnerisalu kingorna.

Tamassuma kinguneraa meeqqanik pinerliissimannginnermut uppernarsaateqartarnermut piumasaqaateqartarneq pillugu Inatsisartut inatsisaat 2010-meersoq allanngortinneqarnera. Ilinniartitaanermullu Naalakkersuisup Nivi Olsen inatsisip allangortinnissaanut siunnersuuteqartuuvoq.

Aamma atuaruk Nivi Olsen: Kikkulluunniit meeqqanik sullissisut innarliisimannginnissaat piumasaraarput

-Taamak pisoqareernerata kingorna qujanartumik eqeersaarujussuarpoq, aamma qanoq periuuseqartarnissaq kommunini, uumallu inatsisi taamaattut pisinnaanissaanut unitsitisussaanera naatsorsuutigilluinnarparput, Ilinniartitaanermut Naalakkersuisoq Nivi Olsen taama oqarpoq.

Tunniussinissaq piumasaqaatinngorpoq

Maannakkummiit kikkulluunniit meeqqanik sullissisut toqqaannartumillu 15-nit inorlugit ukiulinnut attuumassuteqartut pinerlissimannginermik uppernarsaammik tunniussisassasut piumasaateqaatinngorpoq.

Inatsisit allanngunngikkallarmata taamaallat meeqqerisut, ilinniartitsisut klubbinillu sulisut meeqqanik pinerliisimannginissamut uppernarsaamik tunniussisarsimapput.

Inatsilli allanngornerani maanna asaasut, igaffimmi sulisut katersugaasivinniluuniit sulisut uppernarsaateqartariaqarput.

Kommuninut ilitsersuut

Inatsisillu nutaat paasiuminaassinnaammata KANUKOKA ikiuiniarluni paasititsiniaavoq.

- Ilitsersuummik nassiussisimavugut, kommunit piumasimammassuk. Tassanilu allaqqavoq suliffiit ilaanni qaqugukkut uppernarsaat tunniunneqassanersoq. Bjarne Petersen KANUKOKA-mi siunnersortaaneq taama oqarpoq.

Ilitsersuut uani atuaruk

Uppernarsaammimmi aallernissaq kommuunit nammineerlutik akisussaaffigaat.

Tamannnalu malinneqarnissaa pingaaruteqartoq ilinniartitaanermut naalakkersuisoq Nivi Olsen isumaqarpoq.

-Meerartatta illersorneqarnissaat pittaanerpaaffimminiitsiniarlugu inatsit taamatut isikkoqalernikuuvoq.

Nutaarsiassami kukkunermik nassaarsimaguit uunga allaffigineqarsinnaavugut.