Inissiisarfinni immikkoortitsitsivinnut malittarisassat qasukkarneqassasut
TAK.: KNR-ip “Inatsisilerinermut ministereqarfiup inissiisarfiit immikkoortitsivinnik parnaarussiveeraqalernissaat kissaatigigaa” decembarip 28-at 2018 saqqummersippaa, tassani nunatsinni pineqaatissinneqarsimasunut inissiisarfiit nakkutilliiveqanngitsumik aaqqissuussaasut ilisimatitsissutigineqarpoq. Tamanna eqqortuunngilaq. Nunatsinni pineqaatissinneqarsimasunut inissiisarfiit tamarmik immikkut nakkutilliiveqarput. Nakkutilliivinnilli atuinermut malittarisassat inatsisissatut siunnersuutip matuma ataani nassuiaatigineqartut pineqarlutik. KNR-ip kukkuneq ajuusaarutigaa.
Tamanna inatsisinik atuutsitsinermut ministereqarfiup inatsisissatut siunnersuutaani, nunatsinni pinerluttulerinermi inatsimmut allannguutaasussami, atuarneqarsinnaavoq.
Pineqaatissinneqarsimasunut inissiisarfimmiittup immikkut pisuni navianartuni - soorlu imminut toqunnissamik siorasaarinerani imaluunniit sakkortuumik pissusilersuuteqarnerani immikkut nakkutilliivimmiitinnissaa ullumikkut periarfissaavoq.
Nakkutilliiviilli pisuni sakkortuallaanngitsuni atorsinnaanissaat aamma pisariaqartinneqartoq, nunatsinni eqqartuussiveqarnermi siunnersuisooqatigiit isumaqartut Inatsisinik atuutsitsinermut ministereqarfiup inatsisissatut siunnersuummi innersuussutigaa.
Nakkutilliiviilli atornissaannut malittarisassat 2010-mi sukateriffigineqarput, tamatuma kingunerisaatigut nakkutilliiviit pisuni navianannginnerusuni atorneqarsinnaanerat inerteqqutaalerpoq - assersuutigalugu pineqaatissinneqarsimasup aneereerluni aalakoorluni uteqqinnerani.
Siusinnerusumi ajornanngissimagaluarpoq sulisummi inissinneqarsimasoq nakkutilliivimmut igalaakkut nakkutigisinnaasarmassuk.
AAMMA ATUARUK Illoqarfinni nunaqarfinnilu aallaasersortoqartarnera pillugu sukaterisoqassasoq
Tamannali inatsimmut allannguutissatut siunnersuutip akuerineqarneratigut periarfissaaleqqissaaq. Malittarisassallu 2010-p siornatigulli ileqqissallutik.
Nunatsinni pineqaatissinneqarsimasunut inissiisarfiit tamarmik immikkut nakkutilliivilersugaapput. Nuummi pineqaatissinneqarsimasunut inissiisarfissaq marlunnik nakkutilliiveqarnissami saniatigut aamma pisuni akerleriiffiunerpaasuni aamma atorneqarsinnaasumik isumannaallisaavimmik ineeraqassaaq.
Siunnersuut nunatsinni pinerluttulerinermut sakkunullu inatsisinik allanngortiterinissamut, Folketingip inatsisartullu ukiumi nutaami oqallisigisassaannut, ilaavoq.
AAMMA ATUARUK Nunatta Danmarkillu peqqinnissamut aningaasartuutit suli isumaqatigiinngissutigigaat
