Piffissami killiligaanngitsumi pineqaatissinneqarsimasut nunatsinniissinnaasut
Nuummi pineqaatissinneqarsimasunut inissiisarfissaq upernaaq 2019-imi ammarneqarnissaa naatsorsuutigineqarpoq. Folketingillu inatsisissatut siunnersuut killiligaanngitsumik tigummineqartut nutaamut nuussinnaanissaannik ilaqartoq marlunngornermi akueraa.
Tamanna kalaallinut killiligaanngitsumik pineqaatissinneqartussanut aammali maanna Herstedvester Fængselimi Danmarkimiittumiittunut atuuppoq.
AAMMA ATUARUK Piffissami killiligaanngitsumi inissiisarfimmiitinneqartut nuunnertik peqqissimissutigisinnaassagaat
Inatsiseqarnermut ministerip, Søren Pape Poulsenip inatsit tulluusimaarutigaa.
- Kalaallit Nunaata Danmarkillu akornanni pissutsinut tamanna pingaartuuvoq, tassami ukiuni 60-init amerlanerusuni kalaallit killiligaanngitsumik pineqaatissinneqarsimasut Kalaallit Nunaanniit ilaquttatik attaveqaatitillu qimallugit, ungasissumut Danmarkimut aallartitaasarsimapput.
Folketingimi ilaasortat najuuttut 105-iusut inatsimmik taasipput.
AAMMA ATUARUK Parnaarussat ikittuinnaat Nuummut nuukkusupput
Killiligaanngitsumik pineqaatissinneqarsimasunut neqeroorutaasartut soorlu kalaalimerngit kalaallisullu ilinniartitsineq Nuummut nuukkusunngitsunut aamma attatiinnarneqassasut, akuersinermi aamma aalajangiunneqarpoq.
- Tamanna Kalaallit Nunaannut akiitsoraarput, tamanna killiligaanngitsumik pineqaatissinneqarsimasunut Danmarkiliartitaanissaminnik nammineq aalajangiisimanngitsunut akiitsoraarput, Søren Pape Poulsen oqarpoq.