Danskit naalakkersuisui: Piffissami killiligaanngitsumi inissiisarfimmiitinneqartut nuunnertik peqqissimissutigisinnaassagaat

Kalaallit Danmarkimi piffissami killiligaanngitsumi inissiisarfimmiitinneqartut Nuummi pineqaatissinneqarsimasunut inissiisarfimmut nuunneqarnissaat pillugu danskit naalakkersuisuisa inatsisissatut siunnersuutaanni tamanna atuarneqarsinnaavoq. 

Inatsisissatut siunnersuut pineqartoq Folketingimi novembarip aallaqqaataani siullermeerneqassaaq.

AAMMA ATUARUK Forvaringsdømte skal kunne fortryde flytning til Nuuk

Kalaallit Danmarkimi piffissami killiligaanngitsumi inissiisarfimmiitinneqartut Nuummi pineqaatissinneqarsimasunut inissiisarfimmut nuutsinneqartut, Nuummi pineqaatissinneqarsimasunut inissiisarfittaamiitinneqarnertik sungiussinnaanngikkunikku Herstedvester Fængselimut utersinnaatitaanissaat Inatsisartut 2017-imi ukiaanerani ataatsimiinneranni akuersissutigineqarpoq.

Tamatumunnga pissutaasinnaasut ilagaat nunatsinni qanigisaqannginneq imaluunniit Danmarkimi ukiorpassuarni inissiisarfimmiissimanerup kingunerisaanik nunatsinni inuiaqatigiinnut atassutaarussimaneq.

Marloriarlutik peqqissimisinnaatitaassasut

Dansk Folkepartiip siunnersuut tunngaviatigut taperserpaa, danskillu naalakkersuisuisa inatsisissatut siunnersuuteqarnerminni Folketingimi taamaalillutik amerlanerussuteqarput.

- Tunngaviatigut isumaqarpunga inuit (pineqaatissinneqarsimasut, aaqq.) sumiikkusunnerlutik nammineerlutik aalajangertariaqaraat. Aamma isumaqarpunga amerlasuut (kalaallit piffissami killiligaanngitsumi inissiisarfimmiitinneqartut, aaqq.) Danmarkimiiginnarnissartik toqqarusussagaat, Dansk Folkepartiip Kalaallit Nunaannut tunngasunut oqaaseqartartua, Søren Espersen, taama oqarpoq.

Inatsisinik atuutitsinermut ministerip siunnersuutaa naapertorlugu, peqqissimisinnaatitaaneq kalaallit piffissami killiligaanngitsumi inissiisarfimmiitinneqartut Nuummut nuutsinneqarnerannit ukiup affaata iluani atuutissaaq.

AAMMA ATUARUK Herstedvesterimut utersinnaatitaanissamut pissutsit immikkut ittut atuuttariaqassapput

Peqqissimisinnaatitaanerilli marlooratarsinnaapput. Nuummimi pineqaatissinneqarsimasunut inissiisarfimmut nuussinnaatitaaneq kalaallinut Danmarkimi Herstedvester Fængselimi ullumikkut piffissami killiligaanngitsumi inissiisarfimmiitinneqartunut tamanut neqeroorutaavoq.

Pisinnaatitaaffillu taanna piffissami killiligaanngitsumi inissiisarfimmiitinneqartumut Herstedvester Fængselimut utersinnaatitaasumut aamma atuuppoq. Piffissamili killiligaanngitsumi inissiisarfimmiitinneqartoq pillaatimi nunatsinni atornissaanut marloriarluni nuunneqarnissaminut tunngaviatigut periarfissaqarpoq. Taamaattoqartilluguli Herstedvesterimut aappassaanik utersinnaatitaaneq atorunnaassaaq.

Marloriarlunili peqqissimisinnaatitaaneq Søren Espersenip partiimini Dansk Folkepartiimi oqaluuseriteqqaarniarpaa.

- Soorunami nooqattaaginnartoqarsinnaassanngilaq. Tamanna siunertaqarnavianngilaq. Aamma assartuussinermut akisuallaassaaq, KNR-imut oqarpoq.

Socialdemokraatit Kalaallit Nunaannut tunngasunut oqaaseqartartuata, Karin Gaarstedip, inatsisissatut siunnersuummi peqqissisinnaatitaaneq siornatigut isornartorsiorsimavaa. Siunnersuulli saqqummiunneqartoq Folketingimi gruppimit oqaluuserineqareerpaat aatsaat partiip oqaaseqarfigerusuppaa.

AAMMA ATUARUK Inissiisarfinni atornerluisuunermut katsorsaanerit nunatta nammineq akilertassagai