Inissiisarfinni atornerluisuunermut katsorsaanerit nunatta nammineq akilertassagai
Danmarkimi inatsisinik atuutsitsinermut ministereqarfik, Folketingip Kalaallit Nunaannut tunngasunut ataatsimiititaliaanut taama akissuteqarpoq.
Inatsisinik atuutsitsinermut tunngasut Danmarkimit suli akisussaaffigineqartut, inunnik isumaginninnermut tunngasut peqqinnissaqarfimmullu tunngasut Kalaallit Nunaannit tiguneqareerput, atornerluisuunermullu katsorsaanermi aningaasartuutit Kalaallit Nunaata tamanna pillugu nammineq matussusertassagai, ministereqarfiup ataatsimiititaliamut akissutaani ilaatigut allassimavoq.
AAMMA ATUARUK Parnaarussat ikittuinnaat Nuummut nuukkusupput
Tarnimikkulli peqqissutsikkullu katsorsartittunut, Pinerluuteqarsimasunut Nuummi inissiisarfittaassami matoqqasumi inissinneqartussanut aningasartuutissat pillugit suli isumaqatiginninniartoqartoq, inatsisinik atuutsitsinermut ministerip Søren Pape Poulsenip uppernarsarpaa.
Kalaallit Danmarkimi parnaarussivimmi Herstedvesterimiittut, piffissaligaanngitsumillu inissinneqartussattut pineqaatissinneqarsimasut, Nuummi inissiisarfittaassamut nuunneqarnissaminnut periarfissinneqassapput.
Inissinneqarsimasulli arlallit tarnimikkut katsorsarneqartussatut inissinneqarsimapput. Namminersorlutillu Oqartussat, naalagaaffilluunniit aningaasartuutinik matussusiisuussanersut suli ilisimaneqanngilaq.
Katsorsaanermi aningaasartuutissat pillugit isumaqatiginninniarnerit, pinerluuteqarsimasunut Nuummi inissiisarfiup matoqqasup atuutilinnginnerani naammassinissaat, inatsisinik atuutsitsinermut ministerip oqaatigaa.
AAMMA ATUARUK Qinnuteqartut katsorsaasinnaanissaat isumalluarfigaarput