Nunatta Danmarkillu peqqinnissamut aningaasartuutit suli isumaqatigiinngissutigigaat

Nuummi pineqaatissinneqarsimasunut inissiisarfittaassaq qaammatialuit qaangiuppata ammassaaq.

Siunissami inissiisarfimmiittussanngorlugit pineqaatissinneqarsimasut katsorsarneqarnerannik kina aningaasartuuteqartassanersoq, danskit naalakkersuisuisa Naalakkersuisullu suli isumaqatigiinngissutigaat.

Kalaallit Nunaata peqqinnissaqarnermut akisussaaffik 1992-imili tigoreernikuummagu tamanna nunatta akilertariaqaraa, inatsiseqarnermut ministerip, Søren Pape Poulsenip (K) folketingimi ilaasortamut Aaja Chemnitz Larsenimut (IA) akissuteqarnermini allappaa. Matumanilu aningaasaqarneranut akisussaaffik aamma atuuttoq, ministeri allappoq.

Nunarput akileerusunngitsoq

Naalakkersuisulli piumasaqaat itigartitsissutigigaat, akissummi allassimavoq.

Kalaallit Nunaanni Pinerluttunik Isumaginnittoqarfik danskit suli akisussaaffigaat. Taamaammat inissiisarfimmiittussanngortillugit pineqaatissinneqarsimasut peqqissarnerannut akiligassat, assersuutigalugu tarnikkut katsorsartinnerannik aamma nakorsaatitornerannik akiligassat, naalagaaffiup isumagissagai, Naalakkersuisut isumaqarput.  

AAMMA ATUARUK Inissiisarfinni atornerluisuunermut katsorsaanerit nunatta nammineq akilertassagai

Isumaqatigiinnginnerlu taanna nukingernartortaqarpoq. Tamannami kalaallit pineqaatissinneqarsimasut katsorsarneqarnissamik pisariaqartitaminnik pissarsisinnaajunnaarnissartik pissutigalugu Herstedvester Fængselimit Nuummi pineqaatissinneqarsimasunut inissiisarfimmut nuunnissaminnut sapilernerannik kinguneqarsinnaasoq, Søren Pape Poulsenip erseqqissaatigaa:

- Taamaaliorsinnaanngilagut, tamanna danskit naalakkersuisuisa, Kalaallit Nunaata pineqaatissinneqarsimasulluunniit soqutigisarinngilaat.

Naalakkersuisut akiliisarnissamut matumik ikersiipput

Inatsiseqarnermut ministereqarfilli Naalakkersuisullu suli isumaqatigiinniarput, inatsiseqarnermullu ministerip Nuummi pineqaatissinneqarsimasunut inissiisarfittaassap upernaaru ammannginnerani isumaqatigiissuteqarnissaq naatsorsuutigaa.

Ministerili Aaja Chemnitzi Larsenimu akissutimini akiligassat naalagaaffimmut akiligassiissutigineqarsinnaanerannut matumik ikersiitsiarpoq, naak Danmarkimi naalakkersuisut tamanna kajumiginngikkaluaraat.

- Aaqqiissuteqarniarlutali Naalakkersuisut oqaloqatigiinnavissavagut - aamma naak pisussaaffigisorinngisatsinnik aningaasartuuteqarnissatsinnik kinguneqassagaluarpat, akissutaani allassimavoq.

Danmark akiliissappat tamanna Folketingimi Aningaasaqarnermut Ataatsimiititaliap naggaterpiaani akuereqqartussaassavaa.

AAMMA ATUARUK Behov for flere bistandsværger i Grønland

AAMMA ATUARUK Kalaallit pineqaatissinneqarsimasut pillugit isumaqatigiissut Folketingimi taperserneqartoq