Nunatsinni ikorfartuisut amerlanerusut pisariaqartinneqartut

Nalunaarut nutaaq “Linsline til verden” Ilisimatusarfimmi lektorip pd.d-llu, Annemette Nyborg Lauritsenip suliarisaa taama takussutissiivoq.

Nunatsinni pineqaatissinneqarsimasunit 94-init 39-t ikorfartuisussanik amigaateqartut, nalunaarusiap “Livsline til verden”-ip takutippaa.

- Nunatsinni pineqaatissinneqarsimasunut ikorfartuisut sullitaallu imminiiginnarneqarput. Ataqatigiissaarinermik ilinniartitsinermillu amigaateqarneq pissutigalugu ikorfartuisut naammaginanngitsumik, namminnerlu atuuffissaminnik nassaarniartussanngortillugit inissisimasarput, lektori, ph.d-lu Anemette Nyborg Lauritsen oqarpoq.

Pineqaatissinneqarsimasut soorlu oqartussanik naapitsineranni ikorfartorneqarnissaat imaluunniit pinerluuteqarsimasunut inissiisarfiup avataani aalajangersimasumik attaveqaataanissaat siunertaavoq.

Ataqatigiissaarneqarneratali amigaataanera pissutigalugu pineqaatissinneqarsimasut ilaat pisinnaatitaaffimminnik iluamik ikiorneqarneq ajorput.

- Ikorfartuisut nakkutigineqarnissaasa amigaataanerat pissutigalugu sullitat ilaasa pappialatigut taamaallaat ikorfartorteqarnertik paasisarpaat – suliallu pillugit qanimutikorfartuisoqartaratik, Annemette Nyborg Lauritsen oqarpoq.

Nuummi pinerluuteqarsimasunut inissiisarfittaassap upernaaru ammannginnerani, ataqatigiissaarinerup aaqqiissuteqarfigineqarnissaa Anemette Nyborg Lauritsenip inassutigaa.