Illoqarfinni nunaqarfinnilu aallaasersortoqartarnera pillugu sukaterisoqassasoq

Inuit najugaqarfiini eqqaannilu aallaasersorneq pinerluttulerinermi inatsit naapertorlugu siunissami pillarneqaataasinnaalissaaq. Aamma navianartorsiortitsinerusimanngikkaluarpalluunniit. Inatsisissatut siunnersuummi tamanna atuarneqarsinnaavoq.
Assi © : Camilla Dam/KNR
decembarip 14-at 2018 08:00

Alluitsup Paani angut illumi iluani 2012-imi nunaqarfimmi aallaariarpoq. Politiillu angut taamaalioqqunagu oqarasuaatikkut oqaluuppaat, angutillu aallaat igalaakkut miloriuppaa politiinullu tunniutiinnarluni. Inunnik ajoqusertoqanngilaq.

AAMMA ATUARUK Aallaasersorneq akisusinnaavoq

Ukiut pingasut qaangiummata, 2015-imi, angut aalakoortoq Nuummi juullip nalaani fiistip kingorna qoorortuuaqqamik aallaasersorpoq. Angut politiinit tigusarineqarpoq, pisumilu inunnik aamma ajoqusertoqanngilaq.

Pisuni marlunni aallaasersortut pillaatitut akiligassinneqarput.

Danskilli inatsisinik atuutsitsinermut ministeriat, Søren Pape Poulsen (K), Naalakkersuisullu kissaatigaat siunissami taamaaliorneq sakkortunerungaatsiartumik pillarneqaataasinnaassasoq.

Pillaatitut akiliisinneqaannarani inissiisarfimmiittussanngortinneqarneq
Kommunini politiit ullumikkut maleruaqqusaat naapertorlugit inuit najugaqarfiini eqqaannilu illoqarfimmullu nunaqarfimmulluunniit meterinik 500-nik qanitsigisumi aallaasinik atuinissaq inerteqqutaavoq. Ooqattaasarfimmili imaluunniit immikkut ittumik akuersissuteqaraanni aallaammik atuisoqarsinnaavoq, soorlu assersuutigalugu unamminermi.

Aallaasersortoqarneranut amerlanertigut 3000 koruuninik pillaatitut akiliisitsisoqartarpoq, inunnut allanut ’navianartorsiortitsisoqarsimanngikkaangat’. Politiit aamma pisinnaatitaapput aallaat arsaarinnissutigisinnaallugu, malittarisassalli ullumikkut atuuttut malillugit tamanna aatsaat pisinnaavoq aallaat atorlugu unioqqutitsineq ‘sakkortuupilussuuppat’, maleruaqqusani taama allassimavoq.

AAMMA ATUARUK Aallaasit toqqortarineqartarnerinut piumasaqaatit sukannernerusut

‘Illoqarfimmili inuit najugaqarfigisaanni aallaasersorneq pinerluttuliorneruvoq sakkortooq, illoqarfimmiunut assut toqqissisimajunnaartitsisartoq inuiaqatigiinnullu tunngatillugu annertuumik kingunerlutsitsisartoq’, inatsisissatut siunnersuummut oqaaseqaatini taama allassimasoqarpoq. Pingaartumik aallaasersornerit amerlanertigut imigassartornerup ikiaroornartutornerullu kingorna pisarmata.

Taamaammat maleruaqqusat aallaasersornermut tunngassuteqartut kommunini politiit maleruaqqusaanit pinerluttulerinermi inatsimmut nuunneqarnissaat politikerinit kissaatigineqarpoq, taamaaliornikkut inuit najugaqarfiisa eqqaanni aallaasersortut pinerluuteqarsimasunut inissiisarfimmiittussanngorlugit eqqartuunneqarnermik kinguneqarsinnaalersillugu.

AAMMA ATUARUK Sakkut pillugit inatsit Naalakkersuisut sukaterniaraat

Pillaatissamulli inuup inuunermini atugai aallaasernermilu nalaani pissutsit apeqqutaatinneqartassasut, inatsisissatut siunnersuummi allassimavoq.

Siunnersuut sakkut pinerluttulerinermilu inatsisip malunnaatilimmik sukateriffiginiarneqarneranut ilaavoq. Aallaasinik atuinissamut ukiunik minnerpaaffiliinissaq aallaasillu toqqortarineqarnerinut malittarisassat sukannernerulersinnissaat aamma siunnersuutigineqartunut aamma ilaapput.

AAMMA ATUARUK Aallaasinik atuisinnaanermut ukiunik minnerpaaffiliinissaq siunnersuutigineqartoq