Inatsisissatut siunnersuut: Aallaasit toqqortarineqartarnerinut piumasaqaatit sukannernerusut

Ukiuni kingulliunerusuni pisartut alianartut arlallit, pingaartumik meeqqat aallartoorfigineqarlutik ajoquserfigisaasa kingunerisaanik, aallaasit toqqortarineqarnissaannut malittarisassat politikerinit sukateriffigineqartussanngorput.

Nunatsinni sakkut pillugit inatsisip allanngortinneqarnissaanik inatsisissatut siunnersuummi tamanna atuarneqarsinnaavoq.

Nunatsinni politimesteri Bjørn Tegner Bay naapertorlugu, aallaasit ’mianersuaatsumik’ toqqortarineqartarnerat aallartoorluni ajutoortoqartarneranut ilaatigut pissutaasarput.

AAMMA ATUARUK Sakkut pillugit inatsit Naalakkersuisut sukaterniaraat

Ajutoornerni arlalinni aallaasinik piginnittut aallaasitik parnaarullugit toqqortarisimanngilaat, soorlu aamma aallaasit imassallu ataatsimoortillugit toqqortarineqartarsimasut.

Sakkulli ulorianarnerusut arlallit, soorlu assersuutigalugit illuinnarsuutit aallaasillu eqiinnartakkat, immikkut isumannaatsumik toqqortarineqarnissaat politimesterip ullumikkut aalajangersinnaavaa.

Aallaasilli piniutit nalinginnaasut qanoq toqqortarineqarnissaannut inatsimmi ullumikkut malittarisassaqanngilaq. Tamannaavorlu Naalakkersuisut, danskit inatsisinik atuutitsinermut ministeriata Kalaallit Nunaannilu Politimesterip maanna allanngortikkusutaat.

AAMMA ATUARUK Politi: Niårig døde af vådeskud

Politikerit sakkut toqqortarineqarnissaannut sikaavinnik immikkut ittunik imaluunniit sumiitillugit toqqortarineqartarnissaannut siunnersuummi aalajangersimasunik piumasaqaasiunngillat. Siunnersuummili ima allassimasoqarpoq;

"Aallaasit imassanit avissaarsimatillugit toqqortarineqassapput, assersuutigalugu imassat amusarissamiitinneqarlutik imaluunniit aallaammit avissaarsimatillugit matoqqasumiitinneqarlutik."

Aamma aallaat toqqortarineqarfianit allamut nuunneqassappat piginnittup tamanna ilisimasariaqarpaa:

"Aallaat piginnittoq ilisimatinnagu peqataatinnagulu tiguneqarsinnaassananilu atorneqarsinnaassanngilaq."