Aallaasersorneq akisusinnaavoq
Decembari aallartilaartoq Paamiuni aallaasersortoqarneranut atatillugu annertuumik akiliisitsisoqassasoq politiit piumasaraat.
![](/sites/default/files/styles/image_934x467/public/article_images/sirene_630_13.jpg?itok=POrjcT-g)
Allattoq Noah Mølgaard
Politiit sakkortuumik pisoqartillugu orniguttartut timmisartumik Paamiuliartinneqarput decembarip pingajuanni angut 21-nik ukiulik timmiarsiummik illoqarfimmi seqquusarmat.
Maanna politiit piumasaraat politiit timmisartumik ornigutsinneqarnerannut aningaasartutit angutip taassuma akilissagai. Paamiut politeeqarfianni ulluinnarni aqutsisoq Christer Nielsen taama nalunaarpoq.
Pisimasoq taanna pillugu politiit paasiniarnertik naammassereerpaat. Angut 21-nik ukiulik umiatsiat ilaanni timmiarsiummik imassanilu tillissimavoq saneqqutamilu ilaat timmiarsiummik qunusaarsimallugu.
Politiit maanna piumasaraat angut 64.000 koruuninik akiliisinneqassasoq. Paamiut eqqartuussivianni suli eqqartuussummik nalunaarutiginnittoqanngilaq.