Pineqaatissinneqarsimasunik inissiisarfimmi ineqatigiisitsisarneq utaqqisukillisitsisoq

Nunatsinni pineqaatissinneqarsimasunut inissiisarfinni inissat amerlassusaannit pineqaatissinneqarsimasut amerlanerupput. 

Pineqatissinneqarsimasummi ineeqqani ataasiuttarissatut naatsorsuussani arlaliullutik ineqatigiittarput.

Naak inissiisarfinni 154-inut inissaqaraluartoq, pineqaatissinneqarsimasut 165-it inissiisarfinniittut, Pinerluuteqarsimasunut isumaginnittoqarfimmit allagaatinik takunniffigisinnaasani apriilip 18-ianeersuni allaqqavoq.   

Takornartaanngilarli. 

Inissiisarfiit ukiup aappaa avillugu maanna sivisussuseqartumi ineqatigiisitsisalersimasut, nunatsinni Pinerluuteqarsimasunut isumaginnittoqarfimmi pisortaq, Christian Høygaard, nassuiaavoq. 

- Suliniutaasumik ineqatigiisitsisalerneq isumaqarpoq, pineqaatissinneqarsimasut arlallit inissiisarfinni ineeqqani ataasiuttarissani arlaliutinneqartarnerannik. Tassa ineeqqami ataasiuttarissami siniffik ataasiuttariaq atornagu siniffinnik quleriissitalersuivugut. Pineqaatissinneqarsimasullu ineeqqami kisimiinnatik marluulernerannik isumaqarpoq.

Pineqaatissinneqarsimasunut inissiisarfinni utaqqisut ikilisinniarlugit taamaaliortoqarpoq. 

Iluaqutaasimavorlumi. Inissiisarfinnummi utaqqisut ikileriangaatsiarput. 

Pineqaatissinneqarsimasut inissiisarfinniilernissaminnut aggustimi 2022-mi utaqqisut 107-iupput.

Utaqqisut ikilillutik apriilimi 2024-mi 50-iupput.

Utaqqisut ikilisinniarlugit ineqatigiisitsisalerneq suliniutit arlallit ilagigaat, nunatsinni Pinerluuteqarsimasunut isumaginnittoqarfimmi pisortaq oqarpoq.  

Sulisut tamaviaartut

Ineqatigiisitsisalernerli aaqqiissutitsialaanngitsoq, Parnaarussivinni nakkutilliisut kattuffiat isumaqarpoq.

Sulisummi tamaviaarnerulissasut, nunatsinni pineqaatissinneqarsimasunut inissiisarfinni nakkutilliisut sinniisuunerigallagaat Parnaarussivinnilu nakkutilliisut kattuffiata allattaa, René Larsen, oqarpoq.

- Sulerulunnerulissapput, inissammi sipporlugit tigummigallakkat pineqaatissinneqarsimasullu inissinneqartarput, taanna oqarpoq.   

Inissiisarfinnilu nakkutilliisut tamanna malugaat. Ilaatigut napparsimalluni sulinngitsoortarnerup takutikkaa, René Larsen, naliliivoq.

- Pinerluuteqarsimasunut isumaginnittoqarfimmi ineqatigiisitsisoqalerpat, sulinermi atugassarititaasut tamaviaarnanerulissapput. Atugassarititaasullu tamaviaarnarnerulermata inissiisarfinni nakkutilliisut napparsimallutik sulinngitsuukulanerulersut takusinnaavarput. Taamaammat suut tamarmik ataqatigiipput.

Inissat sipporlugit pineqaatissinneqarsimasunik inissiisoqaraangat, inissiisarfinni nakkutilliisut sulinerminnilu atugaat sunnerneqartartut, nunatsinni inissiisarfinni nakkutilliisut sinniisunerigallagaat aamma Parnaarussivinni nakkutilliisut kattuffiata allattaa, René Larsen, isumaqarpoq. Assi © : Fængselsforbundet

Aaqqiissullu pitsaanerpaanngitsoq, nunatsinni Pinerluuteqarsimasunut isumaginnittoqarfimmi pisortap, Christian Høygaardip, nassuerutigaa.  

- Inissinneqarsimasunut nakkutilliisunullu kingunerluttoq isertuutissanngilara, atortummi assigiinngitsut arlaliunneqartarput, sulisullu amerlineqannginnamik pineqaatissinneqarsimasunik nakkutigisassaqarnerulerput. Taamaammat ullut tamaasa pineqatissinneqarsimasunut inissiisarfimmiittartunut tamanut soorunami sunniuteqarpoq.  

Akerlianilli inissiisarfinni ineqatigiisitsisalerneq iluaqutitaqartoq, Christian Høygaard, nassuiaavoq.  

- Taamatut aaqqiisuteqarnitsigut pineqaatissinneqarsimasut eqqartuussummik naammasinnissinnaalernerat iluaqutaavoq. Inuiaqatiinni naapertuilluartoqalersoq oqartoqarsinnaavoq.   

- Pineqaatissinneqarsimasut pineqaatissiissutigineqartumik naammassinnissinnaanngornerat iluaqutaavoq, taamaalillutik inuunertik pinerluttuliornatik ingerlateqqissinnaaniassammassuk, taanna oqarpoq.

Utaqqisut pingaartinnerunagit sulinermi atugarisat pitsaanerussasut

Nakkutilliisut sulinerminni atugarissaarnissaat qulakkeerniarlugu inissiisarfinni ineqatigiisitsinani utaqqisut amerlanerulernerat akuerineqarpat ajunnginnerusoq, Parnaarussivinni nakkutilliisut kattuaffianneersoq, René Larsen, oqarpoq.

- Pineqaatissinneqarsimasut inissiisarfinni inissaqanngikkaangamik utaqqisartuuppata pissusissamisuussagaluarpoq. Politikkikkulli akuerineqanngilaq. Danmarkimi Kalaallit Nunaannilu. Taamaaliornissaq politikerit peqataaffigerusunngilaat, taanna oqarpoq.   

Ineqatigiisitsisarnerli ataavartumik aaqqiissutaasinnanngitsoq, nunatsinni Pinerluuteqarsimasunik isumaginnittoqarfimmi pisortaq, Christian Høygaard, oqarpoq.    

Pineqaatissinneqarlutik inissitat amerlaneri pissutigalugu inissiisarfinni nakkutilliisut napparsimallutik sulinngitsoortarnerisigut takuneqarsinnaasoq, Parnaarussivinni nakkutilliisut kattuffiata oqaatigaa. Assi © : Fængselsforbundet

Utaqqisut ikilisinniarlugit inissiisarfiugallartumik, soorlu Kangerlussuarmi siornatigut inissiisarfiusimasoq assigalugu, pilersitsisoqarsinnaasoq, Parnaarussivinni nakkutilliisut kattuffianneersoq, René Larsen, oqarpoq.    

Danmarkimili inatsiseqarnermut ministeriusimasoq, Nick Hækkerup (S), taamaaliorusunnani 2021-mi oqarpoq.

KNR-ip maanna inatsiseqarnermut ministeriusoq, Peter Hummelgaard (S), apersorniaraluarpaa, iluatsinnaguli. Ministerili allakkatigut ilaatigut ima akissuteqarpoq:

- Kalaallit Nunaanni pineqaatissinneqarsimasunut inissiisarfinni inissaqartitsiniarneq ilungersunartoq arajutsinngeqaara, ineqatigiisitsisarnerlu sulisunut inissinneqarsimasunullu tamaviaarnartoq ilisimavara. Tamanna ilaatigut tunngavigalugu pineqaatissinneqarsimasunut inissiisarfinni inissanik amigaateqarnerup qanoq aaqqiivigineqarnissaa misissorniarlugu Inatsiseqarnermut ministereqarfik sulinermik aallartitsivoq.