Naalakkersuisut pillaatitut iliuuseqassagunik, Ruslandimut nioqquteqarnerup, niueqatigiinnerup suleqatigiinnerullu uninnissaat naatsorsuutigaat. Tassalu nunatsinni inuussutissarsiorneq taamaalilluni eqqorneqassaaq.Assi: Sputnik/Reuters/Ritzau Scanpix

Pillaatitut iliuuseqarnissamut inatsit tusarniaassutigineqartoq

Naalakkersuisut Ruslandimut pillaatitut iliuuseqarsinnaalernissaminnut alloriarput.

Nunarput Ruslandimut pillaatitut iliuuseqartunut ilaassaaq.

Naalakkersuisut Ruslandip Ukrainemik saassussinerata kingorna februaarimi taama nalunaaruteqarput.

Ruslandip aningaaseriviinut, uuliamik gassimillu nioqquteqarneranut assartuineranullu tunngassuteqartunut iliuutsit tassani pineqarput.

AAMMA ATUARUK Ruslandimut pillaatitut iliuuseqarneq: Nunarput ilannguppoq

Naalakkersuisullu inatsisissatut siunnersuummik, pillaatitut assigiinngitsunik iliuuseqarsinnaanissamut periarfissiisumik, maanna tusarniaassuteqarput.

Naalakkersuisut ilaatigut aningaasaqarnikkut killilersuinissamik, niueqatigiinnermik inerteqquteqarnissamik, russillu nunatsinni nalilinnik pigisaqassagunik taakkuninnga tigusisinnaajunnaarsinneqarnissaannik suliniutinillu assigiinngitsunik unitsitsigallarsinnaanissamik atuutilersitsinissamut pisinnaatitsissuteqarniarput.

Inuussutissarsiornermut sunniuteqassasut

Naalakkersuisut pillaatitut iliuuseqassagunik, Ruslandimut nioqquteqarnerup, niueqatigiinnerup suleqatigiinnerullu uninnissaat naatsorsuutigaat. Tassalu nunatsinni inuussutissarsiorneq taamaalilluni eqqorneqassaaq.

Aalisakkat qaleruallillu Ruslandimut nioqqutit nunatta avammut nioqqutaasa 13-14 procenterai.

AAMMA ATUARUK Polar Seafood kinguneqartitsinernit eqqorneqartoq

Suliffiit ilaat annaaneqarsinnaassasut, tusarniaassutigineqartumi allaqqavoq.

- Siunnersuut innuttaasunut sunniuteqarsinnaavoq, tassani allaqqavoq.

Kisianni Ukrainemi sorsunnermut aatsaat atassuteqartoqarpat, nunarput pillaatitut iliuuseqarsinnaassaaq. Aamma Ruslandimuinnaq nunalluunniit sorsunnermi Ruslandimik tapersersuisunut pillaatitut iliuuseqartoqarsinnaassaaq.

AAMMA ATUARUK Múte: Mattussinerit qanoq sunniuteqarnissaat suli oqaatigiuminaappoq

Taavalu pillaatitut iliuutsit nunani tamalaani kattuffinnit nunalluunniit peqatigiittunit soorlu EU-mit akuersissutigineqareersimassapput.

Nunarpulli EU-mut ilaasortaanngimmat, EU-p peqqussutai nunatsinni atuutinngillat. Taamaammat nunarput Ruslandimut pillaatitut iliuuseqarniaruni nammineq peqqussutinik akuersissuteqassaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl