Ruslandimut pillaatitut iliuuseqarneq: Nunarput ilannguppoq

Nunarput Ruslandimut pillaatitut iliuuseqarnissamut ilannguppoq.

Naalakkersuisut siulittaasuat, Múte B. Egede tusagassiuutinut nalunaarummi allappoq.

Europami siuttut, matumani danskit ministeriunerata Mette Frederiksenip peqataaffigisaani Bruxellesimi ippassaq immikkut ittumik ataatsimiinnerisa kingunerisaanik pivoq.

Ataatsimiinnermi tassani Ruslandimut ”sakkortunerpaamik pillaatitut iliuuseqarnissap” atuutilersinneqarnissaa isumaqatigiissutigineqarpoq.

Ruslandip aningaasaqarnerata eqqugaanissaa pillaatitut iliuutsit pingaartumik pissutigaat.

Naalakkersuisut tusagassiuutinut nalunaarutaat naapertorlugu nunatta pillaatitut iliuuserisassat matumani Ruslandip aningaasaqarneranut, nukissiorneranut assartuineranullu eqquinissamik ilaatigut tunngassuteqartut ilannguffigai.

- Ruslandip Ukrainep innuttaasuinut qanoq iliuusii assuarilluinnarpakka. Taamaaliorneq innimiilliorneruvoq, taamaattumillu Ukrainep innuttaasuinik sutigut tamatigut peqatiginninnerput takutissavarput nunat tamat Ruslandimut pillaatitut iliuuserisassaannut ilanngunnitsigut, Naalakkersuisut siulittaasuat, Múte Bourup Egede allappoq.

EU-p pillaatigut iliuuseriniagai Ruslandip aningaaseriviinut 70 procentinut ilaatigut eqquissapput. DR Nyheder Aarhus Universitetimi Naalagaaffiit pissusiinik ilisimatusarfimmi lektorimik, Lars Johannsenimik oqaloqateqarsimasoq taama allaaserisaqarpoq.

- Russit aningaasaqarnerata nunarsuarmi aningaasaqarnermut ilaanissaanik ajornakusoortitsiniarneq pillugu taama iliuuseqartoqarpoq, Lars Johannsen DR-imut oqarpoq.