Múte: Mattussinerit qanoq sunniuteqarnissaat suli oqaatigiuminaappoq
![](/sites/default/files/styles/image_934x467/public/article_images/mute_1.jpg?itok=gSAplgoN)
Rusland Ukrainemik saassussimmat, nunat killiit Ruslandimut pillaatitut iliuuseqarnerput. Nunarpullu iliuutsinut ilannguttoq, Naalakkersuisut tallimanngormat nalunaarutigaat.
Iliuutsilli nunatsinnut qanoq sunniuteqarnissaat maanna oqaatigiuminaattoq, Naalakkersuisut siulittaasuat KNR-imut oqarpoq.
- Nunatsinninngaanniit iliuuserineqartut tassaapput, EU-p kingullermik alloriarfigisaanni nunarsuarmilu nunarsuarmioqatitta allat alloriarfigisimasaat, aningaasarsiornerup silarsuaanut sammiveqarnerusut. Taakkuuppullu iliuuseqarfigineqartut, Múte B. Egede (IA), oqarpoq.
AAMMA ATUARUK Ruslandimut pillaatitut iliuuseqarneq: Nunarput ilannguppoq
Nunat killiit taavalu Japan, Korea Kujalleq Australialu Ruslandimut aningaasarsiornikkut arlalinnik mattussipput. Aamma nunarput taakkununnga ilannguttoq, Naalakkersuisut nalunaarutigereerpaat.
Taakkulu aamma nunatsinnut sunniuteqassasut, Múte B. Egede oqarpoq. Qanorli sunniuteqassanersut nalunarpoq.
- Massakkoqqissaaq sunniutit qanorpiaq akinut nioqqutissanullu sorlernorpiaq sunniuteqaqqissaarumaarnersut oqaatigiuminaappoq.
Ilaatigut Polar Seafood raajanik Ruslandimut tunisisarpoq, politikerillu allamik nalunaaruteqarnissaata tungaanut tunisisarniarlutik oqareerlutik.
AAMMA ATUARUK Inuit aqqusinermi naapitat isumaqatigiipput: Sorsunneq ajorluinnarpoq, mattussinerli pisariaqarpa?
Ruslandimik nerisassanik niueqateqarneq suli mattunneqanngitsoq, Múte B. Egede oqarpoq.
- Taamaattorli alloriarnerit taakkua takkussinnaanerat naatsorsuutigineqarsinnaassaaq.
EU-mi nunat pillaatitut iliuusaat arfinilinnik immikkoortortaqarpoq. Taakku tassaapput, aningaasaqarnikkut, nukissiornermut, assartuinermut, tunisanik nakkutilliinermut aningaasaliinermullu, aallartitat visumeqaratik isersinnaanerannut inunnillu ataasiakkaanut pillaatigut iliuutsit.
Suna nunatsinnut attuumassuteqarnerpaanersoq, Múte B. Egedep ima nassuiarpaa.
- Attuumassuteqarsinnaasoq annerpaaq tassaavoq, aningaasarsiornerup silarsuaaniittoq. Naalakkersuisut siulittaasuat, Múte B. Egede, oqarpoq.
Ukrainemilu sorsunnermut atatillugu aalajangiunneqartut sukkasuumik amerliartortut taassuma ilanngullugu oqaatigaa.