Polar Seafood kinguneqartitsinernit eqqorneqartoq
Kalaallit Nunaani suliffeqarfiit namminersortut annersaat Polar Seafood Ruslandip Ukrainemik sakkutuuliineratigut nunanit assigiinngitsunit kaattamik anaaneqarnertut sakkortutigisumik Ruslandimut kinguneqartitsinerup sunnerpaa.
Naak Ruslandimut nerisassanik nioqquteqarnermi massakkut kinguneqartitsinerit eqqunneqanngikkaluartut, Ruslandip aningaasaqarnikkut nunat assigiinngitsut suleqatigiiffiannit mattunneqarnerata kingunerisaanik Ruslandimik niueqatigiinnissaq ajornakusoortorujussuanngortippaa.
Polar Seafood-imi siulersuisunut siulittaasoq Henrik Leth KNR-imut oqarpoq:
- Ruslandimut tunisassiornerput unippoq tunisassiatsinnit aningaasanik pissarsinissarput qulakkeerneqanngimmat.
Aamma Royal Greenland-ip Ruslandimut nioqquteqarnini unitsippaa.
LÆS OGSÅ Royal Greenlandip Ruslandimut niuernini unitsikkaa
Tamanna pivoq Naalakkersuisut siulittaasuata Múte B. Egedep suliffeqarfiit namminersorlutik oqartussanit pigineqartut taamasa russinik niueqateqarunnaarnissaannut kaammatoreermagit.
- Namminersorlutik Oqartussat aamma Naminersorlutik Oqartussat suliffeqarfiutaat tamaasa kaammattorpavut, pissutsit maannakkutut itsillugit niueqatigiinneq sinaakkutissat iluaniitinneqassasoq, Múte B. Egede KNR-imut oqarpoq.
Polar Seafood ileqqorissaarnissakkut pisussaaffeqarnermut qaffasissumut inissinnianngilaq
Ruslandimut nerisassanik nioqquteqarnissamut kinguneqartitsisoqartinnagu Henrik Leth isumaqarpoq Europap Kangiani nunamut angisoorsuarmut raajanik nioqquteqarnissaq kukkunerunngitsoq.
Taamaattumik Polar Seafood Ruslandimut nioqquteqarnerminik ileqqorissaarnissamut pisussaaffeqarneq pissutigalugu unitsitsissanersoq toqqaannartumik aperineqarami, akissutaa imaappoq:
- Politikimik ingerlatsinngilagut, soorunami malittarisassat malippavut maannakkoqqissaarlu inuussutissanik Ruslandimut tunisassiornerit mattussaanngillat, Henrik Leth oqarpoq.
Erseqqissarpaa qaleruallit mikisut aappalaartut nioqqutigineqarnerisa unitsinnera inuiaqatigiinnut kalaallinut akeqanngitsuunavianngitsoq:
- Rusland raajanik nioqquteqarfissuuvoq, allanillu nioqquteqarfeqarnissanik nassaarnissaq ajornakusoortorujussuussaaq.
AAMMA ATUARUK Polar Seafood: Rusland niuerfigiinnarsinnaagutsigu taamaaliussaagut
Henrik Leth-ip akerlianik Royal Greenlandip pisortaanera Mikael Thinghuus isumaqarpoq Ruslandimik niueqateqarneq unitsinneqartariaqartoq:
- Ataasiakkaarluta pisariaqartitavut iluaqutaanerusussanut sanilliullugit salliutissanngilagut, aningaasatigullu ajornartorsiorneq Ukrainemi innuttaasut pisuussutiginngisaminnik ilungersunartorsiortinneqarnerannut sanilliunneqarsinnaanngilaq, pisortaaneq Sermitsiaq.ag-mut oqarpoq.
Aalisakkanik qalerualinnillu Ruslandimut nioqquteqarneq Kalaallit Nunaata avammut nioqquteqarnerata 13-14 procenteraa.
Sulisitsisut/Grønlands Erhverv (GE) naapertorlugit GE-mut ilaasortaasut tamarmik 2021-mi Ruslandimut koruuninik 580 milliuuninik nioqquteqarsimapput.