Royal Greenlandip Ruslandimut niuernini unitsikkaa

- Piginnittuvut aalajangersimapput, Namminersorlutik Oqartussat suliffeqarfiutaasa tamarmik - taamalu aamma Royal Greenlandip - Ruslandimik niueqateqarnitik unitsikkallassagaat.

Royal Greenlandimi pisortaaneq Mikael Thinghuus tusagassiorfimmut Sermitsiaq.ag oqarpoq.

Nunatta Ruslandip Ukrainemut sorsulernerata kingunerisaanik Nunat killeqarfiisa pillaatitut iliuuseqarnerannut ilanngunnissaanik Naalakkersuisut aalajangersimallutik tallimanngormat nalunaaruteqarnerata kingunerisaanik tamanna pivoq.

Ruslandimut inuussutissanik tunisaqarnermut atatillugu sapaatip akunnerani matumani "alloriartoqarsinnaasoq" Naalakkersuisut siulittaasuata, Múte B. Egedep sapaatip akunnerani matumani oqaatigaa.

AAMMA ATUARUK Múte: Mattussinerit qanoq sunniuteqarnissaat suli oqaatigiuminaappoq

Namminersorlutik Oqartussallu suliffeqarfiutaasa Ruslandimik niueqateqarnertik unitsissagaat maanna piumaffigineqarsimapput.

Sulisitsisut (GE) oqarnerat naapertorlugu suliffeqarfiit Sulisitsisunut ilaasortaasut tamarmik Ruslandimut 2021-mi 580 millionit koruuninik tunisaqarsimapput.

Royal Greenlandip pisortaanerata Naalakkersuisut Ruslandimut niuernermik unitsitsinissamik aalajangerneq taperserlugu oqaatigaa.

- Ataasiakkaarluta pisariaqartitavut iluaqutaanerusussanut sanilliullugit salliutissanngilagut, aningaasatigullu ajornartorsiorneq Ukrainemi innuttaasut pisuussutiginngisaminnik ilungersunartorsiortinneqarnerannut sanilliunneqarsinnaanngilaq, pisortaaneq Sermitsiaq.ag-mut oqarpoq.

Nunatta aalisakkat qaleruallillu avammut ataatsimut tunisaasa 13-14 procentii Ruslandimut tunisarigai, Aningaasaqarnermut naalakkersuisuusimasoq, maannalu Inatsisartunut Inuit Ataqatigiinniit ilaasortaq, Asii Chemnitz Narup Naalakkersuisunut apeqquteqaammi allappaa.