Angunnguup Oscarinnassimasoq isiginnaartitseqatigigaa: - Pikkugeqaarput
Nangeqattaartup nanginnerisa sisamaanni siunissamilu saqqummerumaartussami filmip `True Detective´-p takussutissiartaata trailerertaa toorukku Angunnguup kiinaa takussavat.
Hollywoodimi qanittukkut Oscarinnatitsisoqarnerani nunarsuarmi filmiliaritittartut tusaamasaanerpaat aamma issiaqatigai, taamani filmi naatsuliaq `Ivalo`innersuunneqartunut ilaavoq, tassanilu meeqqap pingaarnertut inuttaasup Angunnguaq ataatagisuusaarpaa.
Ilivitsuinnarmik nuannaartuarneq isiginnaartitsisartumut nunarsuarmilu filmiliaritinnerup iluani ilisarineqaleraluttuinnartumut Angunnguaq Larsenimut soorluli naaffeqanngiinnakasillartoq.
Jodie Foster filmiliareqatigigaa
Nangeqattaartumi True Detectivemi Jodie Foster marloriarluni Oscarinnassimasoq peqatigalugu Angunnguaq Alaskamiuusaarpoq piniartoq. Nangeqattaartumimi tassani angutit arfineq-pingasut eqqumiitsumik tammariataartut pillugit arnat paasiniaasartut marluk pingaarnertut inuttaallutik paasiniaasussaapput.
- Isiginnaartitsinermi ataatsimi Jodie Fosterilu filmiliaritippugut, misigisaq tupinnarluinnarpoq ingammik arnaq taanna tassungaaraq naapillugu, ilimagisannillu mikineroqaaq, Angunnguaq Larsen oqaluttuarpoq.
Jodie Foster ilaatigut filmimi ilisimaneqarluartumi ”Ondskabens øjne”-mi pingaarnertut inuttaanini tusaamasaassutigaa, tassanimi FBI-meersuusaarluni toqoraasartoq niaqulaartoq soqqusaalluinnartumillu toqoraasartoq Dr. Hannibal Lecter filmiliaritittartumit Anthony Hopkinsimit inuttaaffigineqartoq pisariniarsaraa.
- Jodie Foster pikkuginaqaaq
Angunnguaq Larsenimut misigisaq pikkunarnerpaaq tassaavoq: Jodie Fosterimik naapitsineq.
- Jodie Fosterimik naapitsinera pikkunarnerpaagunarpoq, meeraallungalimi filmini arlalinni takujuartarpara, taavalu arnaq taanna marloriarluni Oscarimik nersorniarneqarsimasoq saninnguanni filmiliareqatigileriasaarpara, alutornarluinnaqqissaarpoq, Angunnguaq oqaluttuarpoq.
Nangillunilu oqaluttuarpoq atisat atukkani Jodie Fosterip quiasaarluni quilertagikujunnerarsimagai.
- Takugamitigut tupannakujunnerarpaatigut, aammami uagut pikkugilaaratsigu. Ilami aamma uaguulluni tusaamasarsuaq taanna naapillugu ingasalaarami, assorsuarlu filmiliaritillaqqilluinnarpoq.
Kalaalerpaaluit peqataasut
Decembarimi Reykjavikkimi kalaalerpaaloqaqaaq, taakkumi nangeqattaartumut tassunga isiginnaartitsisartutut tunuatungaaniluunniit naammaqutaasussatut peqataasussaatitaapput.
- Nuummi najugalippassuit kalaallillu Danmarkimeersorpassuit taamani Rekjevikkimiipput, soorunalumi nuannisaqatigeeqaagut, Angunnguaq Larsen oqaluttuarpoq.
Kalaallinullu tamakkununnga aamma ilaavoq Niviâna Mørch Pedersen. Taanna Juliamik ateqartuusaarpoq, paasiniaasartullu arnap aappaanut qatanngutaasuusaarluni, paasiniaasartuusaartumut siusinnerusukkut tilluuttartuusimasumut Kali Reisimut.
Angunnguaq Larsen naapertorlugu, amerikamiut filmiliaannut peqataaneq misigisarujussuuvoq imaannaanngitsoq, nuannernerulerporlumi kalaaleqatit allat peqatigisinnaallugit.
- Nunami allamiikkaanni kalaaleqatillu peqatigigaanni kammagiinnerulernartarpoq, taamaammat taakkuulluta Reykjavikkimi unnussiuaarnerpaaluit nuannerluinnartut misigaagut, oqarpoq.
Angunnguaq Larsen aamma oqarpoq nangeqattaartuliaq septembarimi takuneqarsinnaalissasoq. HBO-li naapertorlugu nangeqattaartuliap inernera suli ullulerneqanngikkallarpoq.
