Timersornermut naalakkersuisoq: Pikkorivissunut aningaasaqarneq pitsaanerulissappat ataatsimoorussamik pilersaarusiortoqartariaqarpoq

Timersoqartartut peqatigiiffiisa kattuffii arlallit unammiuaarnerni annertuuni peqataasarnertik ingerlatiinnarusullugu aningaasanik amerlanerusunik taperneqarnissartik piffissami sivitsortumik kissaatigaat. Timersornermulli Naalakkersuisup isornartorsiuineq itinerusumik tigunngilaa, pereersut sammiunnaarlugit siunissamik sammisaqarnissaq kissaatigineruaa.

Allattoq Sebastian Trosborg, Dora Evaldsen

maajip 15-at 2024 07:41

Nutserisoq Alice Sørensen

Pisussanut, ineriartortitsinermut pikkorivissullu ineriartortinneqarnissannut politikerit aningaasaliinerunissaat timersortartut peqatigiiffiisa kattufiinit kissaatigineqarpoq. Pissartanngorniunnernilu annertuuni Kalaallit Nunaata peqataasarnissaa politikerit kissaatigaat.

Kissaalli taanna kattuffiit arlalit aningaasatigut piviusunngortikkuminaatsippaat.

Timersortartullu peqatifgiiffiisa kattuffiini aningaasarliornerup isornartorsiutigineqarnera Aqqaluaq B. Egedep eqqissivilluni qisuariarfigaa.

Kattuffinni aningaasaqarneq naatsumik oqaluttuaralugu

Timersortartut peqatigiiffiisa kattuffii arlalit aningaasaqarnikkut kipiluttunartorsiorput.

Aningaasarliorneq kattuffiit pingasut tassa Greenland Table Tennis Federationip (GTTF), Kalaallit Nunaanni Volleyballertartut Kattuffiata (KVK) aamma Kalaallit Arsaattartud Kattuffiata (KAK) Arctic Winter Gamesertoqarnerani ukioq manna marsimi peqataanngitsoorneranik kinguneqarpoq.

Timersortartut peqatigiiffiisa kattuffiata ilaat Badminton Kalaallit Nunaat (BKN), nunarput sinnerlugu Arctic Winter Gamesimi peqataatitsisarpoq, ukioq manna aamma taamaaliorput.

Susassaqartitsinerli naleqartoq BKN-imi aamma malugineqarsinnaavoq, taakkulu pikkorivissunik ineriartortitsinissamut amerlanernik aningaasaliivigineqarusukkaluarput.

Timersoqatigiit Assammik Arsartartut Kattuffiata (TAAK) siulittaasua aningaasanik amerlanernik tuneqqullutik politikerinut oqariartuuteqarpoq.

Arnat nunanut allanut unammisartut VM-imi peqataaqqammersut sungiusaasui ukiup aallartilaarnerani kattuffimmit soraarsinneqartariaqarsimapput.

Pikkorivissortaqarnerup misigissutitsinnut nanutullu ataatsimoortutut misiginitsinnut pingaaruteqarnera Elite Sport Greenlandip erseqqissarpaa.

Nunatullu ataqatigiinneq misigisanik immikkuullarissunik inuiaqatigiinnilu ataatsimuussusermik pilersitsisarpoq.

Allisiguk

Timersornermut 18 millionit koruuningajaat ukiumut Inatsisartunit tapiissutaasarput. Aningaasat ineriartortitsinermut ingerlatsinermullu atorneqartarput, taakku saniatigut marloriarlutik VM-ertussat immikkut aningaasaliivigineqarput.

Aningaasaliissutit annertussusaat Inatsisartunit akisussaaffigineqarpoq, taakkulu annertussusiliinerat malillugu Naalakkersuisut sulianik ingerlatsisarlutik.

- Tassa nalilersuisoqarsinnaavoq aningaasat atorneqartut annertuallaarnersut imaluunniit ikippallaarnersut, taanna inuttut (Carsten Olsenip, aaqq.) naliliinera nammineq naliliinerattut isigivara. Taamaattorli aamma uanga timersornermut naalakkersuisutut kattuffiit saaffiginikuuakka siunissamut ungasunnerusumut, nalorninaannerusumillu pilersaarusiormermik ingerlataqarnissaq aallarteqqullugu. Timersornermut naalakkersuisoq Aqqaluaq B. Egede oqarpoq.

Timersoqatigiit Assammik Arsartartut Kattuffiata (TAAK) siulittaasua Carsten Olsen aamma aningaasanik amerlanernik tuneqqullutik politikerinut siusinnerusukkut oqariartuuteqarpoq.

Aamma atuarukTAAK politikerinut ikioqquvoq: Aningaasassaaleqivugut

Aqqaluaq B. Egedep naalakkersuisoqarfiata Stavangerimi VM-ertoqarnerani ukioq kingulleq aningaasarpassuit atorlugit peqataatitsinera tissinaannartoq Carsten Olsenip tikkuarpaa, aningaasallu kattuffinnit atorneqarsinnaasimagaluarnerat oqaatigalugu.

Isornartorsiuineq taanna naalakkersuisup ima akivaa:

- Arsanikkuinnaannginnami, aamma timersornerup siuarsarneqarnissaa politikkitalerujussuuvoq aamma naalakkersuisut soqutiginninnerminnik takutitsinissaat nunanit allaninngaanniit aamma pingaartinneqartarluni. Taamaammat tupinnanngitsumik nunat allat naalakkersuisui peqataasarput imaluunniit susassaqartut allat qaffasissumi inissisimasut aamma peqataaniartarlutik. Aqqaluaq B. Egede oqarpoq, taamalu oqarnermigut naalakkersuisoqarfimmi isornartorsiorneqarnera namminerlu peqataanermi isornartorsiorneqarnera toqqaannartumik isummerfiginngilaa.

TAAK kisimi aningaasarliunngilaq

Assammik arsartartut kisimik pilersaarutimi assigiinngitsut piviusunngortinnissaannut aningaasanik amigaateqanngillat.

Aningaasaqarnikkut kipiluttunartorsiornerup pilersaarutinik piviusunngortitsiniarnermut kalluaasarnera timersortartut kattuffiisa arlalit oqaatigereerpaat.

Aamma atuarukTimersortartut peqatigiiffiisa kattuffii: Sipaaqqissaarluta ingerlatsivugut

Taamaattoqarneranut Aqqaluaq B. Egede ima oqaaseqarpoq:

- Kattuffiit aammalu timersornermik ingerlataqarnermik tunngassuteqartut tamaasa suleqatigalugit oqallinneq aallartipparput, timersorneq siuarsaavigineqassappat suunuku suliassat aamma suleqatigiiffigisariaqakkagut ataatsimoorfiusut erseqqissumik suliarineqarnissaat ukioq manna siornalu oqaloqatigiinnernik ingerlataqarfigereerparput. Tassanilu oqaloqatigiinnerni isumaqatigiissutigivarput naqitanngortitsinissamut alloriaqatigiinnissaq suliassatut tullinnguullugu suliarissallugu.

Pissartanngorniunnerni annertuuni soorlu VM-ini peqataaneq timersornermut ineriartuusaasarpoq aamma Kalaallit Nunaata nunarsuup sinneranut nittarsaanneqarnissaanut periarfissatsialaavoq taamaammallu peqataanissaq pingaaruteqarluni.

Aningaasaqarnerlu pisunut malinnaatinneqassappat, susassaqartut ataatsimoorussamik pilersaarusiornissaat Aqqaluaq B. Egedep kissaatigaa

- Timersornermut aningaasaliissutit qaffassappata aamma siunissamut anguniakkat ataatsimoorussat ilisimaneqartariaqarput, taavalu ullumikkut ajornartorsiutaasut aamma naqitagiut nalunaarsorlugit suliarineqartariaqarlutik taamaammat aningaasanik amerlanerusunik piumasaqassagaanni taava aamma sulinermik malitseqartartoq kialluunniit nalunngilaa, timersornermut naalakkersuisoq taama oqarpoq.

Nunatsinni timersornerup siuarsarneqarnissaa kattuffinnit aamma Aqqaluaq B. Egedemit kissaatigineqarpoq.

Kissaateqarnerulli aningaasanik malitseqarnissaa piffissap ingerlanerani paasinarsiumaarpoq, taamaaliortoqassappalli kattuffiit periusissioqqaassapput pilersaarusiorlutillu.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.